नेपाल ट्रेड युनियन महासंघ (जिफन्ट) आवद्ध राष्ट्रिय सौन्दर्यकर्मी युनियन नेपाल, (नाबुन) देवदह नगर कमिटीको आयोजनामा असार २७ गते एक दिने मेकअप सम्बन्धी शिप अभिबृद्धी कार्यक्रम सम्पन्न भएको छ।

कार्यक्रममा देवदह नगरपालिकाका उपप्रमुख विद्यालक्ष्मी गुरुङले सौन्दर्य व्यवसाय पछिल्लो समय महिला आत्मनिर्भरताको एक बलियो र सम्मानित माध्यम बनेको बताउनु हुंदै महिलाहरू आर्थिक रूपमा सबल नभएसम्म समाजको वास्तविक रूपान्तरण सम्भव नहुने जिकिर गर्दै देवदह नगरपालिकाले महिलाहरूको सीप विकास र उद्यमशीलतालाई सधैं प्राथमिकतामा राखेको र आगामी दिनमा पनि यस्ता व्यावसायिक तालिमहरूका लागि आवश्यक सहयोग र सहकार्य जारी राख्ने प्रतिबद्धता व्यक्त गर्नुभयो।

कार्यक्रममा जिफन्ट लुम्बीनी प्रदेश अध्यक्ष हुमकान्त काफ्ले, राष्ट्रिय सौन्दर्यकर्मी युनियन नेपालका केन्द्रीय सदस्य पवि खनाल, सिद्धार्थनगर नगर कमिटी सल्लाहकार एवं वरिष्ठ ब्युटिसियन उषा किरण गुरुङ र बुटवल नगर कमिटीका अध्यक्ष शान्ता खत्री लगायतले मन्तब्य राख्नु भएको थियो । 

नाबुन बागमती प्रदेश अध्यक्ष तथा मेकअप आर्टिस्ट करुणा पुरीले आधुनिक मेकअप प्रविधिका बारेमा प्रशिक्षण दिनुभएको कार्यक्रममा देवदह, बुटवल र भैरहवा क्षेत्रका ६५ जना सौन्दर्यकर्मीहरको सहभागिता रहेको थियो ।

देवदह नगर कमिटीका अध्यक्ष जस्मिन गुरुङको अध्यक्षतामा उपाध्यक्ष विद्या थापाले स्वागत गर्नु भएको कार्यक्रमको सञ्चालन सचिव बन्दना भुसाल भट्टराईले गर्नुभएको थियो।

नेपाल ट्रेड युनियन महासंघ (जिफन्ट) आवद्ध नेपाल स्वरोजगार व्यापार श्रमिक सघ (नेष्ट) को सातौं राष्ट्रिय अधिवेशन २०८३ सालको पुसमा आयोजना गर्ने भएको छ । 

नेष्टको असार २६ गते जिफन्ट सभाहलमा सम्पन्न ४१औ केन्द्रिय कमिटी बैठकले आगामी पुसको २५ र २६ गते काठमाण्डौमा गर्ने  र २०८३ कार्तिक भित्र केन्द्रीय मातहत कमिटीहरू गठन तथा पुनरगठन, सदस्यता बिस्तार तथा नविकरण अभियान संचालन गर्ने निर्णय गरेको हो । 

बैठकमा जिफन्ट अध्यक्ष बिनोद श्रेष्ठले बदलिएको राजनीतिक परिस्थितिमा ट्रेड यूनियन आन्दोलनलाई कसरी अगाडी बढाउने भन्ने विषयमा प्रकाश पार्नु भएको थियो भने महासचिब लक्ष्मण शर्माले जिफन्टको कार्यक्रमलाइ प्रभावकारी कार्यान्वयनकोलागि आवद्ध युनियनको भुमिका बारे प्रकाश पार्नु भएको थियो । 

नेष्ट अध्यक्ष माया गुरूङको अध्यक्षतामा प्रतिनिधि परिषद प्रमूख तथा जिफन्ट राष्ट्रिय कमिटी सदस्य  नारायण न्याैपानेको समेत उपस्थीत रहेको नेष्ट महासचिब राजकुमार श्रेष्ठले जानकारी दिनुभएको छ ।
 

नेपाल ट्रेड युनियन महासंघ (जिफन्ट) आवद्ध राष्ट्रिय सौन्दर्यकर्मी युनियन नेपाल (नाबुन) को असार २६ गते सम्पन्न बराहक्षेत्र नगर भेलाले आयुसा निरौलाको अध्यक्षतामा ९ सदस्यीय नगर कमिटी गठन गरेको छ। 

नाबुनकी केन्द्रीय महासचिव ममता प्रधानले नवगठित कमिटीलाई सक्रिय, अनुशासित र प्रभावकारी रूपमा सञ्चालन गर्न शुभकामना ब्यक्त गर्दै सौन्दर्यकर्मीहरूको पेशागत हकहित, सम्मान र मर्यादाको संरक्षणका लागि नाबुन निरन्तर क्रियाशील रहेको बताउँदै सौन्दर्य व्यवसायलाई केवल पेशागत सीमाभित्र नराखी सामाजिक उत्तरदायित्वसँग पनि जोड्नुपर्ने धारणा राख्नुभयो। 

नाबुन कोशी प्रदेश अध्यक्ष कला डाँगीले नव निर्वाचित कमिटिलाइ शुभकामना मन्तब्य राख्नु भएको भेलाको अध्यक्षता निशा पौडेलले र संचालन कोशी प्रदेश सचिब अमिता पोख्रेलले गर्नु भएको थियो । 
 

सरकारले राइडसेयर श्रमिक गणेश नेपालीलाई आत्मदाहको निर्मम बाटो रोज्न बाध्य बनाएको  नेपाल यातायात स्वतन्त्र मजदुर संगठनले जनाएको छ । सरकारका संरचनाहरु जल्लादको भूमिकामा रहेको बताएको छ । 

संगठनका अध्यक्ष भीमज्वाला राईले यातायात श्रमिक तथा सडकप्रयोगकर्तामाथि ट्राफिक जरिवानाको आतंक, अभद्र व्यवहार, अत्याचार र चरम अपमान कतिसम्म थियो भन्ने उदाहरण नेपालीको आत्मदाहको घटनाले स्पष्ट गरेको बताएकाछन् ।  

शुक्रबार विज्ञप्ती जारी गर्दै गरिखाने श्रमिकलाई आत्मदाहजस्तो निर्मम बाटोे रोज्न बाध्य बनाउने सरकार भएको उल्लेख गर्दै वर्तमान सरकारका संरचनाहरु जल्लादको भूमिकामा रहेको आरोप लगाएका छन् ।  ट्राफिक जरिवानाको नाममा सडकमा आतंक सिर्जना गर्ने, श्रमिकलाई अपराधीकरण गर्ने कार्यहरू अशोभनीय रहेको उल्लेख गर्दै गणेश नेपालीको हृदयविदारक घटनाले देशभरका करिब १३ लाख श्रमिकलाई त्रस्त बनाएको उल्लेख छ ।

संगठनले गणेश नेपालीको आत्मदाह घटनाको निष्पक्ष छानबिन गरी दोषीलाई कानूनी कारबाही गरिनुका साथै उनको आश्रित परिवारलाई क्षतिपूर्ति उपलब्ध गराउनुपर्ने माग राखेको छ । त्यस्तै ट्राफिक जरिवाना र दण्डको नाममा गरिने दमनकारी अभ्यास तुरुन्त रोक्न सरकारसंग माग राखेको छ । सरकारले जारी गर्न लागेको जरिवाना वृद्धि सहितको सवारी तथा यातायात ऐन २०८३ का श्रमिक प्रतिकूल दफाहरु परिमार्जन गर्नुपर्ने सरकारसंग माग रहेकोछ ।

त्यस्तै सडकमा वर्षौँदेखि भइरहेका राज्य आतंकलाई अन्त्य नगर्ने हो भने गणेश नेपालीको आत्मदाहजस्ता घटनामा बढोत्तरी भई थुप्रै श्रमिकले आत्मदाह गर्नुपर्ने अवस्था सिर्जना हुने उल्लेख गर्दै सार्वजनिक यातायात सुधारका लागि भौतिक पूर्वाधारको सुधार र श्रमिकमैत्री नीति निर्माण गर्न माग राखेको छ ।

यातायात श्रमिकलाई सडकमा हुने दुव्र्यवहार र अपमानको अन्त्य, सुरक्षित पूर्वाधार, स्वच्छ कार्यस्थल, तथा सामाजिक सुरक्षा सहितको सुरक्षित जीवनको ग्यारेन्टी लगायतका चारबुँदे ध्यानाकर्षण गराएको छ ।

बिहीबार मध्यान्ह त्रिपुरेश्वरस्थित राहदानी विभाग अघि मुगुका २५ वर्षीय गणेश नेपालीको मोटरसाइकलमा नगर प्रहरीले ह्वीललक लगाएर जरिवाना काटेपछि आफ्नो गल्ती नभएको जिकिर गरे । घण्टौँ मोटरसाइकल नछाडेपछि आफ्नै मोटरसाइकलबाट पेट्रोल निकालेर शरीरमा खन्याई आगो लगाएका थिए उनको उपचारको क्रममा शुक्रबार निधन भएको थियो ।

नेपाल ट्रेड युनियन महासंघ (जिफन्ट)ले राइडरका रूपमा काम गर्दै आएका २५ वर्षीय गणेश नेपालीको उपचारका क्रममा भएको निधनप्रति दुःख व्यक्त गर्दै जिफन्टले घटनाको निष्पक्ष छानबिन, दोषीमाथि कारबाही र पीडित परिवारलाई उचित क्षतिपूर्तिको माग गरेको छ ।

जिफन्टले वर्तमान सरकारले गरिब, श्रमिक र सुकुम्वासीमाथि शृङ्खलाबद्ध रूपमा जनविरोधी र अमानवीय गतिविधि गरिरहेको भन्दै मुगुका गणेश नेपाली रोजगारीका लागि काठमाडौं आएर राइडरका रूपमा संघर्ष गरिरहेको अवस्थामा राज्य संयन्त्रबाट परेको दबाबका कारण आत्मदाहजस्तो कदम चाल्न बाध्य भएको दाबी गरिएको छ। 

त्यसैगरी जिफन्ट आवद्ध राइडर्स युनियन नेपाल (रन) र नेपाल यातायात स्वतन्त्र मजदुर संगठनले असार २६ गते प्रेस विज्ञप्ति जारी गरी गणेश नेपालीको आत्मदाहलाई राज्यको दमनकारी र असंवेदनशील नीतिको परिणाम रहेको भन्दै नेपालीको आत्मदाहबाट भएको निधनप्रति गहिरो दुःख व्यक्त गर्दै घटनाको निष्पक्ष छानबिन, दोषीमाथि कारबाही गर्न सरकारसँग माग गरेको छ।
 

राइड सेयर श्रमिक गणेश नेपालीको आत्मदाहबाट भएको निधन भएको घटनाको निष्पक्ष छानबिन, दोषीमाथि कारबाहीको माग गर्दै  नेपाल ट्रेड युनियन महासंघ (जिफन्ट) आवद्ध राइडर्स युनियन नेपाल (रन), नेपाल राइडर्स तथा अनलाइन श्रमिक संघ लगायतका संस्थाहरूले असार २६ गते बिरअस्पताल परिसरमा शान्तीपुर्ण धर्ना दिएको छ । 

निष्पक्ष छानबिन, दोषीमाथि कारबाही, आश्रीत परिवारलाइ क्षतिपुर्ती, छोरीलाइ निशुल्क शिक्षा, तथा परिवार सदस्यलाइ रोजगारको ब्यवस्था लगायतका माग राखी शान्तीपुर्ण धर्ना कार्यक्रममाको अयोजना गरेको रन केन्द्रीय सदस्य सुदिप परीयारले जानकारी दिनु भएको छ ।