नेपाल ट्रेड युनियन महासंघ (जिफन्ट) आवद्ध नेपाल यातायात स्वतन्त्र मजदुर संगठनले साउन ४ र ५ गते देशभरका जिल्ला प्रशासन कार्यालयमार्फत पूर्वाधार विकास मन्त्रालयलाई ध्यानाकर्षण पत्र पठाउँदै ऐनमा प्रस्तावित ५ सयदेखि १ लाख रुपैयाँसम्मको जरिवाना तथा केही दफा संशोधन गर्न माग गरेको छ ।

संगठनले सरकारले सवारी तथा यातायात व्यवस्था ऐन, २०४९ लाई प्रतिस्थापन गर्न ल्याउन लागेको सवारी तथा यातायात ऐन, २०८३ को दफा ६२ अन्तर्गत ३९ शीर्षकमा ५ सयदेखि १ लाख रुपैयाँसम्म जरिवानाको व्यवस्था गरेको भन्दै त्यसप्रति मजदुर मात्र नभई सर्वसाधारणको समेत असन्तुष्टि रहेको जनाएको छ।

संगठनले हाल कायम रहेको न्यूनतम जरिवाना यथावत् राखेर अधिकतम जरिवानामा मात्रै सीमित वृद्धि गर्न सुझाव दिएको छ। पहिलेको ऐनमा अधिकांश कसुरमा ५ सयदेखि १ हजार ५ सय रुपैयाँसम्म जरिवानाको व्यवस्था रहेको भन्दै अहिले प्रस्ताव गरिएको जरिवाना अत्यधिक रहेको संगठनले जनाएको छ ।

त्यस्तै, दफा ६५ मा रहेको ‘ज्यान मारेमा हुने सजाय’ भन्ने शब्दावलीलाई ‘ज्यान मरेमा हुने सजाय’ बनाउन तथा उपदफा (२) मा रहेको ‘तीन वर्षदेखि दश वर्ष’ को सट्टा ‘बढीमा दश वर्षसम्म’ भन्ने व्यवस्था राख्न संगठनले माग गरेको छ।
प्रस्तावित ऐनमा मापसे वा लापसे गरी सवारी चलाए, अत्यधिक गति, लेन अनुशासन उल्लंघन, मोबाइल प्रयोग, अपारदर्शी सिसा प्रयोग, बढी यात्रु बोक्ने, बीमा नगरी सवारी चलाउने, ट्राफिक संकेत उल्लंघन, हेल्मेट वा सिटबेल्ट नलगाउनेलगायत ३९ प्रकारका कसुरमा ५ सयदेखि १ लाख रुपैयाँसम्म जरिवाना प्रस्ताव गरिएको छ।

संगठनले सरोकारवालासँग व्यापक छलफल गरी मजदुर तथा सर्वसाधारणमैत्री व्यवस्था समेटेर मात्रै सवारी तथा यातायात ऐन, २०८३ जारी गर्न सरकारसँग माग गरेको छ।
 

नेपाल ट्रेड युनियन महासंघ (जिफन्ट) आवद्ध नेपाल स्वतन्त्र होटल क्यासिनो तथा रेष्टुरेन्ट मजदुर युनियन गोकर्ण फरेस्ट रिसोर्ट प्रालि प्रतिष्ठान स्तरको ट्रेड युनियनका सचिब प्रमोद घिमिरेलाइ साउन ५ गते ड्युटीमा रहेकै बेला रिसोर्टका सेक्युरिटी म्यानेजर सुरेन्द्र श्रेष्ठले मरणासन्न हुने गरि कुटपिट गरेको छ ।

घिमिरेलाई कुराकानीका लागि भन्दै एकान्तमा बोलाइएको र  त्यसक्रममा सेक्युरिटी म्यानेजर श्रेष्ठले वाकी–टकीले टाउको र अनुहारमा प्रहार गरी आँखा, मुख तथा नाकमा गम्भीर चोट लागेको तथा नाकको हड्डी समेत भांचेको छ । घिमिरे हाल शंखरापुर अस्पतालमा भर्ना भइ उपचार गरीरहनु भएको छ ।

नेपाल स्वतन्त्र होटल क्यासिनो तथा रेष्टुरेन्ट मजदुर युनियन र अखिल नेपाल होटल क्यासिनो तथा रेष्टुरेन्ट मजदुर संघ गोकर्ण फरेस्ट रिसोर्ट प्रालि प्रतिष्ठान स्तरको ट्रेड युनियनले संयुक्त विज्ञप्ति जारी गरी पीडितलाई न्याय दिलाउन तथा घटनामा संलग्न व्यक्तिमाथि हदैसम्मको कानुनी कारबाही गर्न सम्बन्धित पक्षसँग माग गरेको छ। 

नेपाल ट्रेड युनियन महासंघ (जिफन्ट) अध्यक्ष बिनोद श्रेष्ठ, उपाध्यक्ष जितेन्द्र श्रेष्ठ र सचिब कृष्ण केसीले साउन ६ गते शंखरापुर अस्पताल पुगी घिमिरेको स्वास्थ्य अवस्थाबारे जानकारी लिनु भएको छ । 

नेपाल ट्रेड युनियन महासंघ (जिफन्ट) आवद्ध समग्र उद्योग ट्रेड युनियन नेपाल (ह्वीन), एनटियुसी अवद्ध  नेपाल कारखाना श्रमिक संघ र अन्टुफ अखिल नेपाल औद्योगिक मजदुर संघले वीरगञ्ज–पर्सा औद्योगिक क्षेत्रमा श्रमिक अधिकारको संरक्षण, श्रम कानुनको प्रभावकारी कार्यान्वयन तथा उद्योग–श्रमिक सम्बन्ध सुधार गर्न साउन ५ गते वीरगञ्ज उद्योग वाणिज्य संघलाई संयुक्त रूपमा ध्यानाकर्षण पत्र बुझाएका छ ।

युनियनहरूले केही उद्योगहरूमा श्रमिकलाई ट्रेड युनियन गठन गर्न नदिने वातावरण सिर्जना गरिएको, युनियन गतिविधिमा संलग्न श्रमिकलाई रोजगारीबाट हटाउने तथा नियुक्तिपत्र नदिई काममा लगाउने प्रवृत्ति बढ्दै गएको उल्लेख गरेका छन्। त्यस्तै, सामाजिक सुरक्षा कोषमा सूचीकृत नगराउने, सरकारले तोकेको न्यूनतम ज्याला लागू नगर्ने तथा श्रम कानुनको आधारभूत व्यवस्था कार्यान्वयन नगर्ने समस्या अझै कायम रहेको जनाइएको छ।

ध्यानाकर्षण पत्रमा हाल लागू गरिएको न्यूनतम ज्याला जीवनयापनका लागि समेत अपर्याप्त रहेको उल्लेख गर्दै सरकारले निर्धारण गरेको ज्याला तत्काल सबै उद्योगमा लागू गर्न माग गरिएको छ।  साथै, श्रमिकलाई नियमित रोजगारीको सुनिश्चितता, अनावश्यक आउटसोर्सिङ अन्त्य, समान प्रकृतिको काममा नियुक्तिपत्र प्रदान, सामाजिक सुरक्षा कोषमा अनिवार्य आबद्धता तथा कार्यस्थलमा व्यावसायिक सुरक्षा र स्वास्थ्य (ओएसएच) का मापदण्ड कार्यान्वयन गर्न आग्रह गरिएको छ ।

युनियनहरूले महिला तथा समावेशी श्रमिकका अधिकार संरक्षण, कार्यस्थलमा यौन दुर्व्यवहारविरुद्ध प्रभावकारी संयन्त्र, मातृत्व–पितृत्व बिदाको कार्यान्वयन, नियमित सीप विकास तालिम तथा स्वचालनका कारण रोजगारी गुम्ने जोखिम न्यूनीकरणका लागि पुनःसीप कार्यक्रम सञ्चालन गर्न पनि माग गरेका छन् ।

समस्याको दीर्घकालीन समाधानका लागि उद्योग व्यवसायी र ट्रेड युनियनबीच नियमित संवाद संयन्त्र स्थापना गरी ३० दिनभित्र कार्ययोजना तयार गर्न, आवश्यकताअनुसार श्रम कार्यालयको सहभागिता सुनिश्चित गर्न तथा संयुक्त समितिमार्फत कार्यान्वयन अघि बढाउन पनि पत्रमा प्रस्ताव गरिएको छ।

पत्रमा समग्र उद्योग ट्रेड युनियन नेपालका अध्यक्ष आनन्द थामी, नेपाल कारखाना श्रमिक संघका अध्यक्ष अमृतलाल जोशी र अखिल नेपाल औद्योगिक मजदुर संघका अध्यक्ष बेनी तिमिल्सिनाले हस्ताक्षर गरेका छन्।
 

नेपाल ट्रेड युनियन महासंघ (जिफन्ट)ले २०४८ सालदेखि सञ्चालन गर्दै आएको राष्ट्रिय श्रम श्रोत केन्द्रलाई आधुनिक अनलाइन श्रोत केन्द्रका रूपमा विकास गर्ने प्रक्रिया सुरु गरेको जनाएको छ।

जिफन्टका अनुसार श्रोत केन्द्रमा रहेका सबै पुस्तक तथा अध्ययन सामग्रीलाई डिजिटल माध्यममा रूपान्तरण गरी अनलाइनबाट उपलब्ध गराइनेछ। यसबाट सदस्य, अनुसन्धानकर्ता तथा अन्य पाठकहरूले इन्टरनेटमार्फत अध्ययन सामग्री सहज रूपमा पहुँच गर्न सक्नेछन्।

त्यसैगरी, अन्तर्राष्ट्रिय श्रम संगठन (ILO), ग्लोबल युनियनहरू तथा अन्य अन्तर्राष्ट्रिय अनलाइन पुस्तकालयहरूसँग समन्वय गरी डिजिटल उपकरणमार्फत अध्ययन गर्न सकिने व्यवस्था पनि मिलाइने जिफन्टले जनाएको छ।

अनामनगरस्थित जिफन्ट श्रोत केन्द्रको डिजिटलाइजेशनपछि श्रमिक, ट्रेड युनियनकर्मी, अनुसन्धानकर्ता तथा आम पाठकले अध्ययन सामग्रीमा सहज, छरितो र प्रविधिमैत्री पहुँच प्राप्त गर्ने अपेक्षा जिफन्टले गरेको छ।

नेपाल ट्रेड युनियन महासंघ (जिफन्ट) ले असार २९ गते आवध्द युनियनका नेताहरू बिच कार्यालय ब्यवस्थापन सम्बन्धी छलफल तथा बिदेशिक कार्यक्रममा सहभागीहरू बिच अनुभब आदान प्रदान कार्यक्रम आयोजना गरेको छ । 

जिफन्ट अध्यक्ष बिनोद श्रेष्ठले कार्यक्रमको उद्धेश्यमाथी प्रकाश पार्नु हुंदै कार्यालयलाइ ब्यवस्थीत संचालनकालागी जिफन्ट र आवद्ध युनियनको कार्यालय बिचको समन्वयकालागी निरन्तर छलफल आवश्यक पर्ने बताउनु हुंदै बैदेशीक कार्यक्रममा सहभागीहरूको अनुभव तथा सिकाइलाइ एक आपसमा  बांडन सके नेपालको ट्रेड युनियन आन्दोलनलाइ फाइदा पुग्ने बताउनु भयो ।

कार्यालय ब्यवस्थापन सम्बन्धी छलफल कार्यक्रमम केन्द्रीय कार्यालयको पहिलो तल्लाको युनियनहरूको तर्फबाट भिमज्वाला राइले र दोस्रो तल्लाको युनियनहरूको तर्फबाट ज्ञानुमाया क्षेत्रीले बिचार राख्नु भएको थियो । 

त्यसैगरी युनिट्राभ अध्यक्ष सुमन पराजुलीले गत जुन २३ र २४ तारीकमा International Transport Workers' Federation ITF को लण्डनमा सम्पन्न कार्यक्रम र जिफन्ट बिदेश बिभाग सचिब स्मृति लामाले १ देखी ३ जुलाइ मा फिलिपिन्सको मनिलामा FES को आयोजनामा लैङ्गिक न्यायोचित शासन बिषयमा एसिया प्रसान्त स्तरीय संवाद कार्यक्रममा सहभागि हुंदाको अनुभब राख्नु  भएको थियो । 
 

नेपाल ट्रेड युनियन महासंघ (जिफन्ट) आवद्ध नेपाल स्वतन्त्र होटल,क्यासिनो तथा रेष्टुरेन्ट मजदुर युनियन ( नेस्वहोमयु ) होटल पोखरा ग्राण्ड इकाईको असार २८ गते सम्पन्न छैटौं अधिवेशनले यम प्रसाद शर्माको अध्यक्षतामा १४ सदस्यीय कमिटी गठन गरेको छ । 

अधिवेशनलाई सम्बोधन गर्दै युनियन केन्द्रीय अध्यक्ष लक्ष्मण तिवारीले होटल श्रमिकले पाउदै आएको १०% सेवा शुल्क पुन प्राप्ति र  योगदानमा आधारित सामाजिक सुरक्षाको पुर्ण कार्यान्वयनकालागि संगठित भएर लाग्नु पर्ने बताउनु भएको छ । 

अधिवेशनमा जिफण्ट गण्डकी प्रदेश अध्यक्ष रुद्र खत्रीले राजनीतिक  परिवर्तन पश्चात् सरकारले ट्रेड युनियन अधिकारलाई संकुचन गर्दै संविधान  र कानुन प्रदत्त  श्रमिक अधिकार खोस्न खोजेको आरोप लगाउदै अधिकार रक्षाका लागि सबै श्रमिक  संगठित हुनुपर्ने बताउनु भयो ।