नेपाल ट्रेड युनियन महासंघ (जिफन्ट) केन्द्रीय श्रम सम्बन्ध परिषद्ले सरकारले जारी गर्न तयारी गरिरहेको प्रस्तावित सवारी तथा यातायात ऐन, २०८३ मा यातायात श्रमिकका हक–हित, सामाजिक सुरक्षा तथा श्रम अधिकार सुनिश्चित हुने आवश्यक संशोधनका विषयमा साउन १९ गते छलफल गरेको छ ।

जिफन्टको सभाहलमा आयोजित छलफल कार्यक्रममा नेपाल यातायात स्वतन्त्र मजदुर संगठनका अध्यक्ष भीमज्वाला राईले पूर्वाधार तथा विकास मन्त्रालयमा पेश गरिएको तीन महले संशोधन प्रस्ताव प्रस्तुत गर्नुभएको थियो ।

प्रस्तुतीकरणका क्रममा अध्यक्ष राईले प्रस्तावित ऐनका केही प्रावधानहरूले चालक, सहचालक तथा यातायात क्षेत्रमा कार्यरत श्रमिकहरूको श्रम अधिकार, रोजगारीको सुरक्षामा प्रतिकूल प्रभाव पार्न सक्ने भएकाले समयमै संशोधन आवश्यक रहेको बताउनु भयो ।

आफुहरुले संगठनको तर्फबाट ऐनका विविध श्रमिक विरोधी दफाहरुलाई संशोधन गर्नका लागि मन्त्रालयमा गत जेठ १५ गते, असार ३१ गते र देशभरीको सबै जिल्ला प्रशासन कार्यालय मार्फत साउन ४ र ५ गते सरकारको ध्यानाकर्षण गराई सकिएको राईले धारणा राख्नुभयो । श्रमिकमैत्री, न्यायपूर्ण र व्यवहारिक कानुनी व्यवस्था निर्माण गर्न सरकार, रोजगारदाता र श्रमिक संगठनबीच सार्थक संवाद आवश्यक रहेको पनि अध्यक्ष राईले बताउनुभयो ।

छलफलमा सहभागी परिषद्का प्रमुख तथा जिफन्ट उपाध्यष जनक चौधरीले प्रस्तावित संशोधनमाथि धारणा राख्दै यातायात क्षेत्रलाई सुरक्षित, व्यवस्थित र श्रमिकमैत्री बनाउन कानुनमा आवश्यक सुधार अपरिहार्य रहेको बताउनु भएको थियो । चौधरीका अनुसार यो विषय नेपाल यातायात स्वतन्त्र मजदुर संगठनको मात्र नभएर यातायातको साधन चलाउने र उपयोग गर्ने सबैको साझा विषय भएको बताउनुभयो । उहाँका अनुसार यसलाई यहीबेला संशोधन गर्न सकिएन भने भविष्यमा सबैले दुःख पाउनुपर्ने दिन आउने बताउनुभयो । 

जिफन्टका उपाध्यक्ष विदुर कार्कीले यातायात श्रमिकको सम्मान, पेशागत सुरक्षा र सामाजिक सुरक्षाको प्रत्याभूति हुने गरी ऐनलाई परिमार्जन गर्नुपर्ने बताउनुभयो । उहाँले सरकार समक्ष प्रस्तुत सुझावलाई थप सटिक बनाएर विषयगत रुपमा छलफल गरेर ऐन संशोधनमा नेतृत्व चनाखो हुनुपर्ने बताउनुभयो ।  जिफन्टका सचिव तथा श्रम सम्बन्ध परिषद् सचिव कृष्ण केसीले सुझावलाई थप व्यवस्थित बनाएर निर्णायक संवाद मार्फत श्रमिकका संशोधनका विषयहरुलाई समेट्नु पर्ने बताउनुभयो ।

कार्यक्रममा जिफन्टका उपमहासचिव कमला तामाङले संशोधनका विषयलाई जिफन्टले साझा एजेण्डका रुपमा प्रस्तुत गर्ने बताउनु भयो । कार्यक्रममा जिफन्टका सचिव विजया खड्का, स्मृति लामाले समेत सरकारले श्रमिकका विषयहरु समेट्न बाध्य हुनेगरी कार्यक्रम तय गर्नुपर्ने बताउनुभयो । छलफलले प्रस्तुत तीन महले संशोधन प्रस्तावका विषयमा विस्तृत छलफल गर्दै प्राप्त सुझावलाई समेटेर प्रधानमन्त्री वालेन्द्र शाह समक्ष थप प्रभावकारी रूपमा पहल गर्ने योजना तर्जुमा गरेको छ ।
 

नेपाल ट्रेड युनियन महासंघ (जिफन्ट) द्वारा साउन १७ गते प्रेश बिज्ञप्ति मार्फत पाकिस्तान स्थित ब्रड पिक हिमालमा गएको हिमपहिरोमा परी निधन भएका पर्वतारोहणका विश्वप्रसिद्ध नायक निर्मल पुर्जा ‘निम्स दाई’ तथा साहसी पर्वतारोहीहरूप्रति भावपूर्ण श्रद्धाञ्जली अर्पण गरेको छ ।

शोक बिज्ञप्तीमा विश्व पर्वतारोहणको इतिहासमा अद्वितीय कीर्तिमान कायम गर्दै साहस, सङ्कल्प र समर्पणको अनुपम उदाहरण प्रस्तुत गर्ने नेपालका गौरव, पर्वतारोहणका विश्वप्रसिद्ध नायक निर्मल पुर्जा ‘निम्स दाई’ तथा उहाँका साहसी सहयात्रीहरू पुरबहादुर गुरुङ ‘युक्ता’, किली पेम्बा शेर्पा ‘किलु’, निमा शेर्पा, नवाङ थिन्डु शेर्पा र ग्यालु शेर्पा पाकिस्तान स्थित ब्रड पिक हिमालमा गएको हिमपहिरोमा परी निधन भएको दुःखद समाचारले नेपाल ट्रेड युनियन महासंघ (जिफन्ट) अत्यन्त स्तब्ध तथा मर्माहत भएको उल्लेख गरेको छ।

उहाँहरूको असामयिक निधनले नेपालको पर्वतारोहण क्षेत्रले मात्र होइन, समग्र राष्ट्रले आफ्ना साहसी, समर्पित र प्रेरणादायी सन्ततिहरू गुमाएको भन्दै जिफन्टले यो घटना नेपालको पर्वतारोहण इतिहासका लागि अत्यन्त पीडादायी क्षति भएको बिज्ञप्तीमा भनेको छ ।
 

ब्रोड पिकमा हिमपहिरोमा परेका नेपाली पर्वतारोहीहरूको सकुशल उद्धारका लागि नेपाल र पाकिस्तान सरकारसँग प्रभावकारी खोज तथा उद्धार अभियान सञ्चालन गर्न जिफन्टले साउन १५ गते प्रेश बिज्ञप्ती मार्फत अपिल गरेको छ ।

नेपाल ट्रेड युनियन महासंघ (GEFONT) ले पाकिस्तानको काराकोरम क्षेत्रमा अवस्थित ८,०४७ मिटर अग्लो ब्रोड पिक हिमालको शिखर नजिक हिमपहिरोमा परी बेपत्ता भएका नेपाली पर्वतारोहीहरूको शीघ्र तथा सकुशल खोजी–उद्धार गर्न नेपाल सरकार, पाकिस्तान सरकार तथा सम्बन्धित निकायसँग आग्रह गरेको छ।

जिफन्टले जारी गरेको अपिलमा विश्वप्रसिद्ध नेपाली पर्वतारोही निर्मल “निम्स” पुर्जा लगायत अनुभवी नेपाली पर्वतारोहीहरू बेपत्ता भएको घटनाले आफूहरू स्तब्ध तथा अत्यन्त मर्माहित भएको जनाएको छ। साथै, बेपत्ता पर्वतारोहीहरूका परिवारजन, आफन्त तथा सम्पूर्ण पर्वतारोहण श्रमिक समुदायप्रति हार्दिक ऐक्यबद्धता व्यक्त गर्दै उहाँहरूको सकुशल उद्धारको कामना गरेको छ।

बेपत्ता पर्वतारोहीहरूमा पुर बहादुर गुरुङ “युक्त”, किली पेम्बा शेर्पा “किलु”, निमा शेर्पा, नावाङ थिन्डु शेर्पा, ग्यालु शेर्पा तथा निर्मल पुर्जा “निम्स दाइ” रहेका छन्।

जिफन्टले खोज तथा उद्धार कार्यलाई उच्च प्राथमिकताका साथ प्रभावकारी रूपमा अघि बढाउन, आवश्यक सबै स्रोत–साधन तत्काल परिचालन गर्न तथा सम्बन्धित निकायबीचको समन्वयलाई अझ सुदृढ बनाउन आग्रह गरेको छ।

जिफन्टले नेपाली पर्वतारोहीहरूले विश्व पर्वतारोहण क्षेत्रमा पुर्‍याएको योगदान राष्ट्रको गौरव भएकोले उनीहरूको सुरक्षा, सम्मान र संरक्षण सुनिश्चित गर्नु राज्य तथा सम्बन्धित सबै सरोकारवालाको साझा दायित्व भएको भन्दै  बेपत्ता पर्वतारोहीहरूको सकुशल उद्धारको कामना गर्दै उहाँहरूका परिवारजन, पर्वतारोहण श्रमिक तथा सम्पूर्ण समुदायप्रति ऐक्यबद्धता प्रकट गरेको छ।
 

पाकिस्तानस्थित “ब्रोड पिक” शिखर आरोहणका क्रममा हिम पहिरोमा परी विश्वप्रसिद्ध नेपाली पर्वतारोही निर्मल पुर्जा मगर (निम्स दाइ) सहित नेपाली आरोहीहरू (पुनबहादुर गुरुङ, निमा शेर्पा, ङवाङ्गथिन्दु शेर्पा, किली पेम्बा शेर्पा (किलु), गेलु शेर्पा सहित विदेशी नागरिक समेत) बेपत्ता भएको खबरले नेपाल ट्रेकिङ्ग-ट्राभल्स-र्याफ्टिङ्ग-एयरलाइन्स श्रमिक यूनियन (यूनिट्राभ) ले अत्यन्त मर्माहत भएका जनाएको छ।

यूनिट्राभले भनेको छ, ‘पर्यटन तथा पर्वतारोहण क्षेत्र नेपालको अन्तर्राष्ट्रिय पहिचान, गौरव र अर्थतन्त्रको महत्वपूर्ण आधार हो । प्रतिकूल मौसम, हिमपहिरो र अन्य प्राकृतिक जोखिमकाबीच आफ्नो ज्यानको बाजी राखेर कार्यरत पर्वतारोही, उच्च हिमाली गाइड तथा सहयोगी श्रमिकहरूले राष्ट्रको प्रतिष्ठा उँचो बनाउन पुऱ्याएको योगदान अतुलनीय छ । उनीहरूको साहस, समर्पण र व्यावसायिक दक्षताप्रति युनिट्राभ नेपाल उच्च सम्मान व्यक्त गर्दछ ।’

यस दुःखद घडीमा बेपत्ता रहेका सम्पूर्ण आरोहीहरूको शीघ्र सकुशल उद्धार होस् भन्ने कामना गर्दै खोज तथा उद्धार कार्यलाई थप प्रभावकारी, तीव्र र समन्वयात्मक बनाउन पाकिस्तानस्थित नेपाली दूतावास, पाकिस्तानी सरकार, सरोकारवाला सम्बन्धित निकाय तथा अन्तर्राष्ट्रिय समुदायसँग यूनिट्राभले अनुरोध गरेको छ साथै कुटनैतिक पहलकदमीका लागि नेपाल सरकार परराष्ट्र मन्त्रालय, संस्कृति, पर्यटन तथा नागरिक उड्ययन मन्त्रालय र श्रम तथा सामाजिक सुरक्षा मन्त्रालयलाई यूनिट्राभले अनुरोध गरेको छ।
यस विपद्को समयमा विक्षिप्त आफन्त तथा परिवारजनका साथै सम्पूर्ण नेपाली पर्वतारोहण समुदायप्रति धैर्यधारण गर्ने शक्ति प्राप्त होस् भन्ने कामना गरेको छ।

यूनिट्राभका अध्यक्ष सुमन प्रसाद पराजुली र महासचिव रामबहादुर श्रेष्ठद्वारा संयुक्तरूपमा जारी विज्ञप्ति भनिएको छ, ‘यस घटनाले पुनः एकपटक उच्च हिमाली क्षेत्रमा कार्यरत श्रमिकहरूको सुरक्षा, बीमा, उद्धार संयन्त्र, जोखिम व्यवस्थापन तथा सामाजिक सुरक्षा, व्यवसायजन्य स्वास्थ्य सुरक्षालाई अन्तर्राष्ट्रिय मापदण्ड अनुसार थप सुदृढ बनाउनु पर्ने आवश्यकता महशुस भएको छ । नेपाल सरकार तथा सम्बन्धित सरोकारवाला निकायले यस विषयमा आवश्यक पहलकदमी गर्न नेपाल ट्रेकिङ, ट्राभल्स राफ्टिङ, एयरलाइन्स श्रमिक युनियन (यूनिट्राभ) नेपाल केन्द्रीय कमिटी परिवार आग्रह गर्दछ । यस कठिन घडीमा सम्पूर्ण पर्वतारोहण समुदायसँग सँगसँगै काम गर्न यूनिट्राभ नेपाल ऐक्यबद्धता व्यक्त गर्दछ ।’
 

कुवेतको उत्तरी क्षेत्रमा साउन १४ गते भएको ड्रोन आक्रमणमा परी कुवेतमा सवारी चालकका रूपमा कार्यरत नेपाली नागरिक सोमकुमार तामाङको दुःखद निधन भएको खबरले नेपाल ट्रेड युनियन महासंघ (जिफन्ट) परिवार अत्यन्त मर्माहत भएको जनाएको छ।

साउन १५ गते जिफन्टले प्रेश बिज्ञप्ती जारी गरी तेह्रथुम जिल्लाका ४४ वर्षीय तामाङको निधन प्रती भावपूर्ण श्रद्धाञ्जली अर्पण गर्दै शोकसन्तप्त परिवारजन, आफन्त तथा सम्पूर्ण शुभेच्छुकहरूप्रति गहिरो समवेदना व्यक्त गरेको छ ।

बिज्ञप्तीमा नेपाल सरकारसँग दिवंगत तामाङको पार्थिव शरीर यथाशीघ्र स्वदेश ल्याउने आवश्यक व्यवस्था गर्न, शोकाकुल परिवारलाई उचित राहत तथा क्षतिपूर्ति उपलब्ध गराउन आवश्यक कूटनीतिक तथा प्रशासनिक पहल तत्काल अघि बढाउन जिफन्टले अनुरोध गरेको छ ।

चर्को जरिवाना र चालकलाई जसरीपनि जेल सजायको व्यवस्था गरिएको नयाँ ऐन मार्फत सरकारले यातायात मजदुर, स्वरोजगार व्यवसायीलाई विस्थापित गर्ने खतरा बढाएको भन्दै नेपाल यातायात स्वतन्त्र मजदुर संगठनले तत्काल ऐन संशोधन गर्न सरकारसँग माग गरेको छ ।

नेपाल यातायात स्वतन्त्र मजदुर संगठन काठमाण्डौं उपत्यका बुकिङ कमिटीको साउन १३ गते सम्पन्न दोस्रो अधिवेशन उद्घाटन गर्दै संगठनको अध्यक्ष भीमज्वाला राईले यस्तो कुरा बताउनु भएको हो  । राईका अनुसार नयाँ कानुनले सडक सुरक्षालाई प्रवद्र्धन गर्नु आवश्यक भए पनि सजायमुखी व्यवस्थालाई मात्र प्राथमिकता दिँदा देशका १३ लाख यातायात मजदुर, स्वरोजगार र व्यवसयाीको पेशामा प्रत्यक्ष असर पर्ने बताउनु भयो । राईको भनाइमा ५ सयदेखि एक लाख रुपैयाँसम्मको जरिवाना असहनीय हुने मात्र होइन, जेल सजायको व्यवस्थाले उनीहरूको परिवारसमेत संकटमा पर्ने अवस्था सिर्जना हुने कुरा बताउनुभयो ।

सार्वजनिक यातायात क्षेत्रमा यातायात मजदुरहरु र साना लगानीका स्वरोजगारमा आधारित वर्गको उल्लेख उपस्थिति रहेकाले कानुनमा हुने यस्ता कठोर दण्डात्मक व्यवस्थाले मजदुर विस्थापित हुने र व्यवसाय बन्द हुने बताउनु भएको छ ।
कार्यक्रमका प्रमुख अतिथि राईले दुर्घटना न्यूनीकरणका लागि चालकको क्षमता विकास, नियमित तालिम, सुरक्षित सडक पूर्वाधार, प्रभावकारी ट्राफिक व्यवस्थापन तथा सवारीको प्राविधिक परीक्षणलाई प्राथमिकता दिनुपर्ने धारणा राख्नुभएको छ । अध्यक्ष राईका अनुसार दण्ड मात्र बढाएर सडक सुरक्षा सुनिश्चित गर्न सकिँदैन; त्यसका लागि सुधारात्मक र निवारणमुखी नीति आवश्यक हुन्छ ।

कार्यक्रममा नेपाल यातायात व्यवसायी राष्ट्रिय महासंघका महासचिव डेकनाथ गौतमले यातायात मजदुर तथा व्यवसायीका प्रतिनिधिहरु सहितका सरोकारवालासँग छलफल गरेर बन्ने कानुनलाई व्यावहारिक, न्यायोचित र श्रम र लगानीमैत्री बनाउन सरकारसँग आग्रह गर्नुभएको छ । 

त्यसैगरी संगठनका केन्द्रीय उपाध्यक्ष तथा बागमती इन्चार्ज नवराज घिमिरेले सार्वजनिक यातायातलाई सुरक्षित, व्यवस्थित र दिगो बनाउने उद्देश्यमा आफूहरू प्रतिबद्ध रहेको उल्लेख गर्दै श्रमिक र स्वरोजगार व्यवसायीको अस्तित्व नै संकटमा पार्ने प्रावधानहरू पुनर्विचार गर्न सरकारसंग आग्रह गर्नुभएको छ ।

कार्यक्रममा नेपाल यातायात व्यवसायी राष्ट्रिय महासंघका उपमहासचिव देविन श्रेष्ठ, नेपाल यातायात स्वतन्त्र मजदुर संगठनका बागमती अध्यक्ष बेदप्रसाद घिमिरे लगायतले शुभकामना व्यक्त गर्नुभएको थियो । कार्यक्रमको अध्यक्षता घनेन्द्र विष्ट र सञ्चालन सचिव पवन धरेलले गर्नुभएको थियो ।

अधिवेशनले लोकनाथ सुवेदी (प्रकाश)को अध्यक्षतामा ११ सदस्यीय नयाँ नेतृत्व चयन गरेको छ ।  कमिटीको उपाध्यक्षमा खड्गबहादुर मगर (मिलन), सचिवमा पवन धरेल, सहसचिव सन्तोष श्रेष्ठ र कोषाध्यक्षमा सुवास बराल चयन हुनुभएको छ ।
त्यस्तै सदस्यहरुमा कर्म वाइबा, रमेश श्रेष्ठ, विष्णु खड्का, संग्राम लामा, बालमुकुन्द घिमिरे रहनु भएको छ । सल्लाहकारहरुमा देविन श्रेष्ठ, भर्जमान राई, रमेश खड्का र राजेन्द्र थोकर रहनु भएको छ ।