नेपालमा श्रम ऐन र सामाजिक सुरक्षा ऐनले व्यवस्था गरेको योगदानमा आधारित सामाजिक सुरक्षामा सबै राइडर, डेलिभरी श्रमिक र डिजिटल पेशाकर्मीहरु अनिवार्य रुपमा समेट्नुपर्ने कुरा नेपाल ट्रेड युनियन महासंघ (जिफन्ट) महासचिव लक्ष्मण शर्माले बताउनुभएको छ। 

उक्त कुरा वहाँले भाद्र २६ गते काठमाडौंमा आयोजित एसियामा प्लेटफर्म श्रमिकहरूको सामाजिक सुरक्षाको प्राप्ती विषयक कार्यशालामा आफ्नो कार्यपत्र प्रस्तुत गर्दै बताउनु भएको हो। 

महासचिव शर्माले आफ्ना सबै श्रमिकहरू सामाजिक सुरक्षामा समेट्ने फूडमाण्डुको उदाहरण दिँदै अरु प्लेटफर्म सञ्चालकहरुले पनि आफ्ना हजारौँ श्रमिकहरूलाई मर्यादित काम, सामाजिक सुरक्षा, सम्मान र संवादको लागि तयार रहन आग्रह गर्नुभयो। 

पठाओ, इन्ड्राइव र अन्य सामान डेलिभरी गर्ने कम्पनीहरूले पनि राइडरहरुलाई स्वरोजगार वा अनौपचारिक भनेर योगदानमा आधारित सामाजिक सुरक्षाबाट विमुख गर्न नमिल्ने उहाँले दाबी गर्नुभयो। बेल्जियन ट्रेड युनियन सपोर्ट संस्था डब्लुएसएमको संयोजनमा आयोजित यो सम्मेलनमा कम्बोडिया बंगलादेश नेपाल इन्डोनेसिया फिलिपिन्स लगायतका मुलुकबाट श्रमिक, नागरिक समाज र आइएलओका प्रतिनिधिहरूको सहभागिता रहेकोछ ।
 

बजार व्यवस्थापन तथा बिक्री कर्मचारी संघ, नेपाल (OMMSW) Nepal को दोस्रो स्थापना दिवसको सन्दर्भमा नेपाल ट्रेड युनियन महासंघ जिफन्ट अध्यक्ष बिनोद श्रेष्ठले आगामी दिनहरूमा सबै सदस्यहरूको समर्पण, परिश्रम, र एकताले आफ्ना लक्षित उद्देश्यहरू प्राप्त गर्दै संगठनलाई अझ प्रभावकारी बनाउने छ भन्ने विश्वासका साथ स्थापना दिवसको शुभ कामना दिनु भएको छ ।

अध्यक्ष श्रेष्ठले भाद्र २६ गते भिडियो मार्फत शुभकामना दिनु हुंदै नेपाल सरकारको श्रम तथा सामाजिक सुरक्षा विभागमा ५५६ नं. दर्ता कायम रहेको यो युनियन २०८० भदौ २६ गते दर्ता भई नेपाल ट्रेड युनियन महासंघ जिफन्टमा आबद्ध यस संगठन बिक्री र मार्केटिङ क्षेत्रमा कार्यरत श्रमिकहरूको हक र अधिकार सुनिश्चित गर्नका लागि श्रम बजारमा छुट्टै पहिचान सहितको एउटा नया तर बलियो युनियन भएको बताउनु भएको हो ।

श्रमिकहरूको हक अधिकारको आन्दोलनमा यो युनियन एउटा महत्त्वपूर्ण अंगका रुपमा आफूलाई स्थापित गर्दै यो क्षेत्रका श्रमिकहरूको पेशागत अधिकार विरुद्धको मूक्तिकामी आन्दोलनमा आफ्नो स्थान सदैव अग्रमोर्चामा स्थापित गर्नेछ भन्ने जिफन्टको विश्वास रहेको भन्नु हुंदै अमेरिका, जर्मनी, बेलायत, क्यानडा, अष्ट्रेलिया लगायत विभिन्न देशमा यस्तै खालका संगठनहरूले श्रमिकको पक्षमा महत्त्वपूर्ण भूमिका खेलिरहेका छन् । यी संगठनहरूले श्रमिकहरूको काम गर्ने वातावरण, न्यायपूर्ण तलब, सामाजिक सुरक्षा, र अन्य अधिकारहरू सुनिश्चित गर्न विभिन्न पहलहरू गर्छन् ।

ओम्स नेपालले पनि यस्ता संगठनहरूको अनुभव र रणनीतिहरूको अध्ययन गरेर विभिन्न उद्योगका सेल्स, मार्केटिङ तथा म्यानेजमेन्ट क्षेत्रमा कार्यरत कर्मचारी तथा श्रमिकहरूको पेशागत संगठनको रुपमा बजार व्यवस्थापन तथा बिक्री कर्मचारी संघ, नेपाल ओम्स नेपालले  स्थापनाकालको छोटो अवधिमा सातै प्रदेशमा आप्mनो संगठन विस्तार र निर्माणमा उल्लेखनीय प्रगति गरेको छ । आगामी दिनहरूमा सबै सदस्यहरूको समर्पण, परिश्रम, र एकताले आप्mना लक्षित उद्देश्यहरू प्राप्त गर्दै संगठनलाई अझ प्रभावकारी बनाउने छ भन्ने विश्वासका साथ अध्यक्ष श्रेष्ठले स्थापना दिवसको शुभ कामना दिनु भएको छ ।

इन्सपायर एसियाको आयोजनामा भदौ २५ गते काठमाडौँमा सम्पन्न दोस्रो विश्व पथप्रदर्शक राष्ट्रहरूको एसियन बैठकमा जिफन्ट अध्यक्ष बिनोद श्रेष्ठले – नेपालमा मर्यादित काम, योगदानमा आधारित सामाजिक सुरक्षा लगायतका श्रमिक पक्षीय थुप्रै कामहरु श्रम क्षेत्रमा उपलब्धि भएको बताउँदै यसको प्रभावकारी कार्यान्वयनमा अझै पनि समस्या रहेको बताउनु भएको छ ।  

प्यानेलिस्टको रुपमा आफ्नो कुरा राख्दै ¬अध्यक्ष श्रेष्ठले ¬– दिगो विकास लक्ष्य हासिल गर्नकालागी श्रम क्षेत्रमा भएका उपलब्धिहरूलाई प्रभावकारी कार्यान्वयन गर्दै गर्न बांकी कामहरू पुरा गर्न हामी सबैको दायित्व रहेको भन्नु हुँदै मिलेर अगाडी बढ्नको विकल्प नभएको बताउनु भयो ।  

दिगो विकासको लक्ष्यहरू प्राप्त गर्न कोविड-१९ को महामारी र अन्य कारणहरुले ढिलो हुने भएपछि त्यसलाई द्रुत गति दिन सुरु भएको यो विश्व अभियानको सदस्य राष्ट्र नेपाल पनि हो र एसियाका बांगलादेश, कम्बोडिया, भियतनाम र इण्डोनेसियाहरु पनि सदस्य राष्ट्र हुन।  
 

नेपाल यातायात स्वतन्त्र मजदुर संगठन गण्डकी प्रदेश अध्यक्ष विष्णुबहादुर केसीले यातायात क्षेत्रको सुधार र ट्राफिक व्यवस्थापनका लागि पूर्वाधारमा लगानी बढाउन आवश्यक भएको बताउनु भएको छ । 

ट्राफिक व्यवस्थापन र यातायात क्षेत्रको सुधारको सम्बन्धमा गण्डकी प्रदेश प्रहरी तालिम केन्द्र पोखराले यातायात व्यवसायी एवं मजदुर र नेपाल प्रहरीका कर्मचारीबिच भाद्र २४ गते आयोजित अन्तरक्रिया कार्यक्रममा अध्यक्ष केसीले सो कुरा बताउनु भएको हो  ।

अध्यक्ष केसीले सवारी दुर्घटना न्यूनीकरण तथा ट्राफिक व्यवस्थापनका लागि राज्यका निकायले प्राविधिक शिक्षा तथा व्यवसायिक तालिम परिषद् (सिटिइभिटी) जस्तै तालिम प्रदायक संस्थाको व्यवस्था गरी निश्चित अवधिको तालिम सञ्चालन गर्न माग गर्दै आफ्नो संगठनले संस्थागत रुपमा यातायात मजदुरलाई सचेत बनाउन ‘म जिम्मेवार सवारी चालक’ लगायत सवारी दुर्घटना न्यूनीकरणका लागि देशव्यापी रुपमा अभियान संचालन गर्दै आएको जानकारी दिनु भएको थियो ।
 

चिया कफि मजदुर युनियन नेपालले भदौ २४ गते हिमालय महालक्ष्मी चिया वगान दमकमा व्यवसायजन्य स्वास्थ्य र सुरक्षा बारेमा अभिमुखीकरण कार्यक्रम सम्पन्न गर्‍यो ।

चिया बगानमा काम गरे कै कारण लाग्नसक्ने रोग र यसबाट बच्ने उपाय, काम गर्दा अपनाउनु पर्ने सावधानी र व्यक्तिगत सुरक्षा सामाग्रीको प्रयोगका बारेमा जिफन्ट कोशी प्रदेश उपसचिव हरी अधिकारीले प्रशिक्षण दिनु भएको थियो ।
 

दाङ तुल्सीपुर उपमहानगरपालिका–११ का ४३ वर्षका रुपलाल चौधरी गत भाद्र २२ गते मलेशियाबाट नेपाल फर्किने तयारीमा थिए । साढे चार वर्षपछि घर फर्कन लागेका उनी एयरपोर्टमै मृत्यु भएको हो।

दिउँसो करिब २ बजे क्वालालाम्पुरको एयरपोर्ट पुगेपछि घरमा पत्नी दिदी, भिनाजु र आफन्तलाई र मलेसियामै रहेका भाइ लोकमणिसँग भिडियो कल र फोन गर्दै आफू फर्कन लागेको जानकारी दिएका थिए ।

नेपाल फर्किने बेलासम्म पनि घरमा खबर नआएपछि परिवारका सदस्य आत्तिए । उनको मोबाइलमा फोन गरिरहे, तर उठेन ।

लामो समयसम्म फोन गरिरहेपछि मलेसियाली नागरिकले फोन उठाएर केही भने, तर कसैले बुझेन । रुपलालका छोरा विपिनले मलेसियामा नै रहेका काका लोकमणिलाई बुझ्न लगाए। लोकमणिले बुझ्दा रुपलालको एयरपोर्टमै मृत्यु भएको खुलेको हो ।