कैलाली जिल्लाको धनगढी उपमहानगर वडा नम्बर ३ स्थित भन्सार कार्यालय नजिकै मिलन चोकमा रहेको इन्धन ढुवानी गर्ने टेंकर पार्किङ स्थलमा भदौ २२ गते राती साढे ११ बजे अज्ञात समूहले साङ्घातिक आक्रमण गरेको छ । 

आक्रमणमा टेंकर चालक हरि देउवा र सहचालक अनिल देउवामाथि हमला गरी गम्भीर घाइते बनाएको घटनाप्रति (जिफन्ट) घोर आपत्ति र भर्त्सना गर्दछ । 

घाइते चालक र सहचालकको टाउको, हात र खुट्टामा गहिरो चोट लागेको छ । हाल उनीहरूको माया मेट्रो अस्पतालमा उपचार भइरहेको । 

घटनाको न्यायिक छानबिन, संलग्नलाई कडा कारबाही गर्न र घाइते श्रमिकहरूको तत्काल उपचारको प्रबन्ध गर्न जिफन्ट जोडदार माग गर्दछ ।

समाजमा हुने यस्ता अपराधी क्रियाकलापहरू अन्त्य गर्दै श्रमिकहरूलाई सुरक्षित रुपमा काम गर्ने वातावरण बनाउन पनि नेपाल सरकार समक्ष माग गर्दछ ।

त्यसैगरी नेपाल यातायात स्वतन्त्र मजदुर संगठन केन्द्रीय कमिटी र सुदूरपश्चिम प्रदेश कमिटीले एक विज्ञप्ति जारी गर्दै घटनाप्रति घोर आपत्ति र भर्त्सना गरेको छ । घटनामा संलग्न जोकोही भए पनि तत्काल कानुनी दायरामा ल्याइ कडा कारबाही गर्न र घाइते श्रमिकहरूको तत्काल उपचारको प्रबन्ध गर्न जोडदार माग गरेको छ ।

नेपाल बिजुली, पेण्टर, प्लम्बर तथा निर्माण मजदुर युनियन (क्युपेक-नेपाल) मेची नगर कमिटीको भदौ २२ गते  काँकडभिट्टामा सम्पन्न तेस्रो अधिवेशनले विश्वनाथ राजवंशीको अध्यक्षतामा ३ सदस्यीय सल्लाहकार कमिटी सहित १३ सदस्यीय नगर कमिटी निर्वाचित गरेको छ ।

क्युपेक उपाध्यक्ष अम्बिर कुमार लिङ्देनको प्रमुख आतिथ्यतामा सम्पन्न अधिवेशनमा  केन्द्रीय सदस्यहरू देवकुमार राई, दुर्गादेवी गुरागाई, जिफण्ट कोशी प्रदेश कमिटी सदस्य तथा झापा संयोजक खेमराज पोख्रेल लगायतका नेताहरू सहभागी रहनु भएको थियो । 

नेपाल ट्रेड युनियन महासघ जिफन्ट आबद्ध  राईडर्स युनियन नेपाल (रन) को योजना बैठक भाद्र २२ गते जिफन्ट केन्द्रीय कार्यालय मनमोहन मजदुर भवन, पुतलीसडकमा सम्पन्न भयो ।

जिफन्ट राष्ट्रिय कमिटी सदस्य तथा राईडर्स युनियन नेपालका अध्यक्ष माधव पाण्डेको अध्यक्षतामा सम्पन्न सो बैठकले आगामी ६ महिना संगठन सुदृढीकरण तथा सदस्यता बिस्तार अभियान सञ्चालन गर्ने निर्णय गरेको छ ।

बैठकमा जिफन्ट महासचिव लक्ष्मण शर्माले जिफन्टले बदलिँदो श्रम संसारलाइ ध्यानमा राखी सबै क्षेत्रका श्रमिकहरूलाइ जिफन्टमा सङ्गठित गर्दै नेपालको ट्रेड युनियन आन्दोलनलाई सशक्त बनाउने अभियानका साथ क्रियाशील रहेको बताउँदै यस क्षेत्रका श्रमिकहरूलार्इ सङ्गठित गर्न जिफन्टले गर्दै आइ रहेको सहयोग निरन्तर रहिरहने बताउनु भयो ।  बैठकमा जिफन्ट उपमहासचिव नरनाथ लुईटेलको पनि सहभागिता रहेको थियो ।

नेपाल स्वरोजगार व्यापार श्रमिक संघ (नेष्ट) कोशी प्रदेश कमिटीको आयोजनामा १ दिने “नेतृत्व विकास तालिम” कार्यक्रम भाद्र २२ गते विराटनगर मा सम्पन्न भयो । 

नेष्ट कोशी प्रदेश अध्यक्ष तिलक बहादुर थापाको अध्यक्षतामा सचिव नयेन्द्र विष्टले सञ्चालन गर्नु भएको सो तालिममा जिफन्ट अध्यक्ष विनोद श्रेष्ठले संगठनमा नेतृत्व विकास, संगठन निर्माण र योगदानमा आधारित सामाजिक सुरक्षा लगायतका समसामयिक विषयको वारेमा प्रशिक्षण दिनु भएको थियो ।

तालिम कार्यक्रममा जिफन्ट कोशी प्रदेश अध्यक्ष किशोर धमला, जिफन्ट राष्ट्रिय कमिटी सदस्य सुमन पराजुली र नेष्ट केन्द्रीय सदस्य सावित्रा खडकाको उपस्थिति रहेको थियो ।

नेपाल ट्रेड युनियन महासघ जिफन्ट आबद्ध युनियन युनिट्राभले विराटनगरको सुख्खा बन्दरगाहमा काम गर्ने श्रमिकहरूको भाद्र २१ गते भेला सम्पन्न गरेको छ । 

युनिट्राभका केन्द्रीय अध्यक्ष सुमन पराजुलीको अध्यक्षतामा सम्पन्न सो भेलाले रन्जित मण्डलको अध्यक्षतामा ११ सदस्य कमिटी गठन गरेको छ । 

जिफन्ट अध्यक्ष बिनोद श्रेष्ठले सगठनको महत्त्व, योगदानमा आधारित सामाजिक सुरक्षा, श्रम कानुन र व्यवसायजन्य स्वास्थ्य सुरक्षा लगायत विषयमा प्रकाश पार्नु भएको भेलामा जिफन्ट कोशी प्रदेश अध्यक्ष किशोर धमला, जुगकाटेमयु सल्लाहकार परीषद प्रमुख धर्मानन्द सन्जेल, मुरारि भट्टराई, व्हीन उपाध्यक्ष मनोज मगर, नेकपा एमाले बिराटनगर महानगर १८ वडा अध्यक्ष जितेन्द्र कामत लगायतका नेताहरूको उपस्थिति रहेको थियो।

नेपाल उद्योग वाणिज्य महासंघ (FNCCI) र नेपालका ३ ठुला ट्रेड युनियन महासंघहरूले श्रमसम्बन्धी समस्या समाधान गर्न साझा फोरमको स्थापना गरेका छन् । 

काठमाडौंको टेकुस्थित FNCCI, सचिवालयमा भाद्र १९ गते सम्पन्न बैठकले यस्तो सहमति गरेको हो ।नेपाल ट्रेड युनियन महासंघ (जिफन्ट) अध्यक्ष विनोद श्रेष्ठले, श्रम बजारलाई व्यवस्थित गर्दै अगाडि बढ्ने दृष्टिकोण स्थापित गर्न आगामी दिनमा आउन सक्ने 

चुनौतीको दुई पक्षीय रूपमा न्यूनीकरणका उपाय पहिचान गर्दै जानुपर्नेमा जोड दिनुभयो । 

श्रेष्ठले योगदानमा आधारित सामाजिक सुरक्षा कोषलाई अझ सक्रिय र प्रभावकारी बनाउँदै लानु पर्ने र यसका लागि श्रमिक र रोजगारदाता दुवै पक्षको भूमिकालाई बढाउँदै लान जरुरी रहेको बताउनु भयो । 

बैठकमा नेपाल उद्योग वाणिज्य महासंघका अध्यक्ष चन्द्रप्रसाद ढकालले पछिल्लो समय देशमा रोजगारदाता–श्रमिक सम्बन्ध सुधारोन्मुख भएता पनि भविष्यमा आउन सक्ने चुनौती समाधान गर्न रोजगारदाता र श्रमिकबिच सहकार्य र समन्वय हुनुपर्ने धारणा राख्नुभयो । 

बैठकमा संयुक्त ट्रेड युनियन समन्वय केन्द्र ( JTUCC) का अध्यक्ष योगेन्द्र कुँवर र नेपाल उद्योग वाणिज्य महासङ्घकी उपाध्यक्ष एवम् रोजगारदाता परिषद्का सभापति ज्योत्सना श्रेष्ठले JTUCC  र ट्रेड युनियन बिच विगतमा भएका समझदारीलाई कार्यान्वयनमा लैजान कुनै बिलम्ब गर्न नहुने बताउनु भयो ।