नेपाल सरकारले संसदको बैठक स्थगित गरी एकतर्फी ढङ्गले अध्यादेश मार्फत कानुनहरु निर्माण र खारेज गर्दै अलोकतान्त्रिक प्रकृया अपनाएकोमा नेपाल ट्रेड युनियन महासंघ (जिफन्ट)ले आपत्ती जनाएको छ ।

जिफन्टको बैसाख २२ गते बसेको पदाधिकारी तथा सचिवालयको बैठकमा संवैधानिक व्यवस्था सहितको ट्रेड युनियन अधिकार तथा जनजीविका कुण्ठित हुने गरी सरकार अघि बढेको र निजामती क्षेत्रमा ट्रेड युनियन गठन गर्ने प्रावधानको खारेजी, त्रिपक्षीय संरचनामा भएका श्रमिक र रोजगारदाताहरुको प्रतिनिधित्वको व्यवस्थालाई राजनीति नियुक्तिका पदहरु संगै त्रिपक्षीय संरचनाको रोजगारदाता र श्रमिक सबैलाई पदमुक्त गरिएको र प्रतिनिधित्व केवल सहभागी मात्रै नभई त्रिपक्षीय संरचनाको महत्त्वपूर्ण रोकारवालाको रुपमा राख्नुपर्दछ भन्ने विषयमा छलफल भएको थियो । 

बैठकले संवैधानिक व्यवस्था, त्रिपक्षीयता सहित ट्रेड युनियनका आधारभूत मूल्यमान्यता र नेपाल पक्ष राष्ट्र भई अनुमोदन गरेका आइएलओ अभिसन्धीहरुको पालना नगरेको निष्कर्श सहित जिफन्टले आवश्यक कदम चाल्ने निर्णय समेत गरेको छ । 
 

नेपाल उद्योग वाणिज्य महासंघ (FNCCI)को २२ गते सम्पन्न निर्वाचनबाट अन्जन श्रेष्ठको  आगामी तीन वर्षकालागि नयाँ कार्यसमिति चयन भएको छ।

नेपाल ट्रेड युनियन महासंघ (जिफन्ट)ले नव निर्वाचित कार्य समितीलाइ बधाइ तथा कार्यकाल सफलताको शुभकामना दिंदै ट्रेड युनियन र उधोग ब्यवसायी बिचको सहकार्यले असल औधोगिक सम्बन्ध कायम गर्न सकिने भएकोले ट्रेड युनियन र उधोग ब्यवसायी बिच टकराव होइन, साझेदारी, संवाद- सहकार्य- र सहअस्तित्व आवश्यक रहेको बताएको छ ।
 

नेपाल ट्रेड युनियन महासंघ (जिफन्ट) सहयोग समुह मलेशियाले प्रवासी श्रमिकका लागि सामाजिक सुरक्षा सहितको मर्यादित काम,शान्ति र सुरक्षायुक्त कार्यस्थल हाम्रो अभियान” नाराका मे दिवस २०८३ को सन्दर्भमा बैसाख २० गते मे दिवस शुभकामना अदान प्रदान कार्यक्रम सम्पन्न गरेको छ । 

कार्यक्रमा जिफन्ट मलेशिया संयोजक तथा मलेशियन टिम्बर युनियन परियोजनाका अर्गनाइजर वेदकुमार खतिवडाले सन २००५ देखीको जिफन्टको निरन्तर प्रयासले अहिले मलेशियन ट्रेड युनियन महासंघ (MTUC एमटियुसी )अन्तरगत रहेका युनियनहरुमा नेपाली प्रवाशी श्रमिकहरू पनि आवद्ध हुनपाउने र तीनीहरूले पनि  स्थानिय श्रमिकहरूले पाउने सम्पुर्ण सेवा सुबिधा पाउने ब्यवस्था रहेको भन्नु हुंदै यो अधिकार प्राप्तीको लडाइमा जिफन्ट सहयोग समुह मलेशियालाइ सहयोग गर्नु हुने ग्लोवल युनियन बिडब्लुआइ,  एमटियुसी र आवद्ध युनियनहरू र निरन्तर लाग्नु हुने जिफन्ट सहयोग समुहका सदस्यहरू प्रती आभार प्रकट गर्नु भएको थियो । 

जिफन्ट सपोर्ट ग्रुप मलेशियाका अध्यक्ष श्री प्रेम मगरले मे दिवसको शुभकामना दिनुहुंदै मलेशियाको  रोजगार ऐन र कानुन अनुसार श्रमिकले पाउने सेवा सुबिधाका प्रकाश पार्नु भएको कार्यक्रमको संचालन उपाध्यक्ष संजय यादवले गर्नु भएको थियो ।

त्यसैगरी जिफन्ट सहयोग समुह कतारले प्रवासी श्रमिकका लागि सामाजिक सुरक्षा सहितको मर्यादित काम,शान्ति र सुरक्षायुक्त कार्यस्थल हाम्रो अभियान” नाराका साथ अन्तर्राष्ट्रिय श्रमिक दिवस (मे दिवस २०२६) मनाएको कतार जिफन्ट सहयोग समुहका अध्यक्ष समुन्द्र खडकाले जानकारी दिनु भएको छ ।

नेपाल सरकारले लोकतन्त्र, संवैधानिक व्यवस्था सहितको ट्रेड युनियन अधिकार तथा जनजीविका कुण्ठित हुने गरी अघि बढेको सन्दर्भमा जिफन्टको गम्भीर ध्यानाकर्षंण भएको जनाएको छ।

संसदको बैठक स्थगित गरी एकतर्फी ढङ्गले अध्यादेश मार्फत कानुनहरु निर्माण र खारेज गर्दै अलोकतान्त्रिक प्रकृया अपनाएकोमा जिफन्टले गम्भीर विमती प्रकट गरेको छ ।

त्यसैगरी निजामती क्षेत्रमा ट्रेड युनियन गठन गर्ने प्रावधानको खारेजी, त्रिपक्षीय संरचनामा भएका श्रमिक र रोजगारदाताहरुको प्रतिनिधित्वको व्यवस्थालाई राजनीति नियुक्ती करार गरी खारेज गर्नुका साथै, सुकुम्वासी तथा अव्यवस्थित बसोवासीहरुलाई वैकल्पिक व्यवस्थापन नगरी उठिवास लगाउने कारवाहीको जिफन्टले विरोध गरेको हो ।

जिफन्टले सरकारलाई नेपालको संवैधानिक व्यवस्था, त्रिपक्षीयता सहित ट्रेड युनियनका आधारभूत मूल्यमान्यता र नेपाल पक्ष राष्ट्र भई अनुमोदन गरेका आइएलओ अभिसन्धीहरुको पालना गर्न अनुरोध गर्दै अन्यथा यसले गर्नसक्ने गम्भीर र दीर्घकालिन असरहरुबो बारेमा पनि सरकारलाइ सचेत गराउएको छ । 
 

नेपाल ट्रेड युनियन महासंघ (जिफन्ट)ले अन्तर्राष्ट्रिय श्रमिक दिवस मे डे २०८३ बैसाख १८ गते विविध कार्यक्रम गरी मनाइएको छ ।

कामको अधिकार, श्रमको सम्मान, सीपको अभिवृद्धि; प्रविधिसँग प्रगति-श्रमिकसँग समृद्धि भन्ने नारासहित मे दिवस २०८३ को अवसरमा नेपाल ट्रेड यूनियन महासंघ (जिफन्ट) ले काठमाडौंमा श्रमिक र्‍याली निकालेको हो । 

काठमाडौंको भृकुटीमण्डपबाट हजारौँ श्रमिकहरूको सहभागितामा सुरु भएको र्याली सुन्धारा, जमल, घण्टाघर, कमलादी, पुतलीसडक र पद्मोदय हुँदै पुनः भृकुटीमण्डपमै पुगेर कोण सभामा परिणत भएको थियो।

जिफन्ट अध्यक्ष विनोद श्रेष्ठले ट्रेड युनियन अधिकार कसैको मायाले प्राप्त गरेको अधिकार नभइ हामीले सङ्घर्ष गरेर प्राप्त गरेको अधिकार कसैको लहडमा श्रमिकहरूको संगठित हुन पाउने अधिकार खोस्न नसक्ने र नेपालको श्रम आन्दोलन कमजोर नभएको भन्नु हुंदै हरेक श्रमिक विरुद्धका गतिविधिको प्रतिकार गर्न सक्ने क्षमता  नेपाली श्रम आन्दोलनमा रहेको बताउनु भयो ।

श्रमको सम्मान, सीप र उत्पादनको अभिवृद्धि; र समग्र नेपालको समृद्धिकालागि जिफन्ट सदैब सम्बादकालागी तयार रहेको भन्नु हुंदै अध्यक्ष श्रेष्ठले “कामको अधिकार, श्रमको सम्मान, सीपको अभिवृद्धि; प्रविधिसँग प्रगति, श्रमिकसँग समृद्धि!” को अभियानमा जिफन्ट कृयाशिल रहेको बताउनु भयो । कार्यक्रमको संचालन जिफन्ट महासचिब लक्ष्मण शर्माले गर्नु भएको थियो ।

त्यसैगरी जिफन्ट कोशी प्रदेशद्वारा विराटनगरमा आयोजित कार्यक्रममा प्रदेश अध्यक्ष किशोर धमलाले “नेपालको ट्रेड युनियन आन्दोलन कसैले रहरले गरेको होइन, श्रमिकको अधिकार र सामूहिक सौदाबाजीका लागि रगत–पसिना बगाएर स्थापित गरिएको भन्नु हुंदै जिफन्टका सदस्यहरूलाई अनुशासित र मर्यादित भइ “कामको अधिकार, श्रमको सम्मान, सीपको अभिवृद्धि; प्रविधिसँग प्रगति, श्रमिकसँग समृद्धि!” को जिफन्ट अभियानमा लाग्न अनुरोध गर्नु भयो ।

कोशी प्रदेश कै झापा जिल्लाको भद्रपुर र बिर्तामोडमा, सुनसरी जिल्लाको धरानमा श्रमिक र्याली सहित सभा र उदयपुर जिल्लाको जलजलेमा रक्तदान गरी जिफन्टले मे दिवस मनाएको जिफन्ट कोशी प्रदेश अध्यक्ष किशोर धमलाले जानकारी दिनु भएको छ ।

जिफन्ट मधेश प्रदेशले जिफन्ट उपाध्यक्ष मन्जु थापाको प्रमुख अतिथ्यमा सिमरामा मजदुर सभाको आयोजना गरी मे दिवस २०८३ मनाएको छ भने सर्लाही, सिराहा र जनकपुरमा पनि जिफन्टको आयोजनामा मजदुर सभा सम्पन्न भएको जिफन्ट मधेश प्रदेश अध्यक्ष कमलेश झाले श्रमिक खबरलाइ जानकारी दिनु भएको छ ।

त्यसैगरी जिफन्ट बागमती प्रदेश अन्तरगत मकवानपुरमा श्रमिक र्याली सहित सभा, चितवन जिल्लामा श्रमिक सभा र दोलखामा रक्तदान कार्यक्रमको आयोजना गरी मे दिवस मनाएको छ  ।

मे दिवस २०८३ को सन्दर्भमा जिफन्ट गण्डकी प्रदेश कमिटीद्वारा गण्डकी प्रदेश भौतिक पुर्वधार तथा यातायात मन्त्रि गोविन्द बहादुर नेपालीको प्रमुख अतिथ्यतामा पोखरामा श्रमिक सभा तथा शुभकामना आदान प्रदान  कार्यक्रम सम्पन्न गरेको छ भने, स्याङ्जा जिल्लाको पुतलीबजारमा र म्याग्दी जिल्लाको बेनीमा पनि  श्रमिक सभाको आयोजना गरी मे दिवस २०८३ मनाएको छ  ।

त्यसैगरी जिफन्ट लुम्बिनी प्रदेश कमिटीले रूपन्देही जिल्लाको बुटवलमा, बर्दिया जिल्लाको बासगढ़ीमा, बाके जिल्लाको क़ोहलपुरमा र पारासी जिल्लाको सरावलमा श्रमिक र्याली र सभा गरी मे दिवस भव्य रुपमा सम्पन्न गरेको छ ।

जिफन्ट कर्णाली प्रदेश कमिटीले सुर्खेत जिल्लाको बिरेन्द्रनगरमा र सुदुरपस्चिम प्रदेशले कैलाली जिल्लाको धनगढी र कंचनपुर जिल्लाको भिमदत्तनगरमा श्रमिक र्याली र सभाको आयोजना गरी अन्तर्राष्ट्रिय श्रमिक दिवस मे डे २०८३ मनाएको छ ।

संयुक्त ट्रेड युनियन समन्वय केन्द्र (JTUCC)ले वैशाख १९ गते एक वक्तव्य जारी गरी सरकारले लोकतान्त्रिक मूल्य मान्यता तथा संवैधानिक व्यवस्थासङ्ग बेमेल हुने गरी श्रमिक अधिकार संकुचित गर्ने तथा जनताका आधारभूत आवश्यकतालाई अझ कष्टदायक हुने गरी गरेका निर्णयहरुको सम्बन्धमा जेटियुसिसिको गम्भीर ध्यानाकर्षण भएको जनाएको छ। 

JTUCC अध्यक्ष विनोद श्रेष्ठले जारी गर्नु भएको वक्तव्यमा निजामती सेवामा ट्रेड युनियन गठन गर्ने प्रावधान तथा विभिन्न त्रिपक्षीय संरचनामा भएका श्रमिक र रोजगारदाताहरुको प्रतिनिधित्वको व्यवस्थालाई खारेज गर्नुका साथै, महंगीको मारमा परेका आमनागरिकहरुलाई राहत दिनु पर्नेमा सुकुम्वासी तथा अव्यवस्थित बसोवास भएकाहरुलाई वैकल्पिक व्यवस्थापन समेत नगरी उठिवास लगाउने कारवाहीको विरोध गरेको छ ।

वक्तव्यमा मुलुकको संवैधानिक व्यवस्था, त्रिपक्षीयता सहित श्रम आन्दोलनले स्थापित गरेका आधारभूत मूल्य मान्यता र नेपाल पक्ष राष्ट्र भई अनुमोदन गरेका आइएलओ अभिसन्धीहरुको सम्मान गर्दै कार्यान्वयन गर्न समेत सरकार समक्ष आग्रह गरेको छ ।