देशभरका ३९ वटा स्थानीय तहले शिक्षकहरूलाई गत साउनदेखिको तलब तथा चाडपर्व भत्ता नदिएको पाइएको छ । 

१२ जिल्लाका ३९ वटा पालिकाले संघीय सरकारले पठाएको पैसा समेत तलब नदिई रोकेको नेपाल राष्ट्रिय शिक्षक सङ्गठनका महासचिव हंसबहादुर शाहीले बताउनु भएको छ ।

सङ्घीय सरकारबाट उपलब्ध सशर्त अनुदान अनुसार स्थानीय तहहरूले समयमा नै तलब भत्ता वितरण गर्नुपर्नेमा हालसम्म ती पालिकाहरूले शिक्षकहरूको चाडपर्व खर्च तथा नियमित तलब भत्ता निकासा गरेका छैनन् जसले गर्दा शिक्षक कर्मचारीहरू समयमा नै तलब भत्ता प्राप्त गर्ने अधिकारबाट वञ्चित भएको उनको भनाइ छ ।

नेपाल राष्ट्रिय शिक्षक सङ्गठनले विज्ञप्ति जारी गरेर संवैधानिक तथा कानुनी व्यवस्था बमोजिम तत्कालै शिक्षक तथा कर्मचारीहरूको तलब भत्ता निकासा गर्न माग गरेको छ । 
 

नेपाल ट्रेड युनियन महासंघ (जिफन्ट) आबद्ध युनियन स्पोर्ट्स युनियन नेपाल (सन)ले असोज २४ गते पुतलीसडक स्थित जिफन्ट सभाहलमा एक कार्यक्रमको आयोजना गरी खुल्ला अन्तर्राष्ट्रिय बुदो मार्सल आर्ट च्याम्पियनसिपमा सहभागी हुने खेलाडीलाई बिदाइ र गिनिज बुकमा नाम लेखाउन सफल फुटबल खेलाडीलाई सम्मान गरेको छ ।

अजरबैजानमा अक्टोबर १७ देखि २० सम्म आयोजना हुने खुल्ला अन्तर्राष्ट्रिय बुदो मार्सल आर्ट च्याम्पियनसिप प्रतियोगितामा सहभागि हुने टोलीको प्रमुख प्रशिक्षक एवं व्यवस्थापकमा स्पोर्ट्स युनियन नेपाल (सन)का काठमाण्डो जिल्ला अध्यक्ष वीरकृष्ण महर्जन रहेका छन् ।

जिफन्ट अध्यक्ष बिनोद श्रेष्ठले खेलाडीहरू पूजा लामा, विनिश महर्जन, ज्ञानेन्द्र हमाल, वीरचन्द्र नकर्मी र सतिश बलामी रहेको टोलीलाई राष्ट्रिय झण्डा हस्तान्तरण गर्नु हुँदै प्रतियोगितामा सफलताको लागी शुभकामना दिनु भएको थियो ।

त्यसैगरी कार्यक्रममा फुटबल खेलमा १ घण्टामा नौ हजार २१८ पटक टच गरी विश्वकिर्तिमान कायम गर्दै गिनिज बुकमा नाम लेखाउन सफल टोखाका फुटबल खेलाडी सजन डंगोललाई जिफन्ट अध्यक्ष बिनोद श्रेष्ठले सम्मान पत्र प्रदान गरिएको थियो । 

स्पोर्ट्स युनियन नेपाल (सन)का अध्यक्ष तथा जिफन्ट उपाध्यक्ष सीता लामाको अध्यक्षतामा भएको सो कार्यक्रममा, जिफन्ट उप महासचिव नरनाथ लुर्इटेल, राष्ट्रिय कमिटी सदस्य सुमन पराजुली, नेकपा एमाले मजदुर विशेष जिल्ला कमिटी अध्यक्ष तुलसी सिवाकोटी, नेकपा एमाले काठमाण्डौ जिल्ला कमिटी सदस्य मणिराज डंगोल लगायतका अतिथिहरूले प्रतियोगितामा सहभागी टोलीलाई शुभकामना तथा गिनिज बुकमा नाम लेखाउन सफल फुटबल खेलाडीलाई बधाई दिनु भएको थियो । 

स्पोर्ट्स युनियन नेपाल (सन)का महासचिव सुदिप शर्माले संचालन र उपाध्यक्ष युवराज जिरेलले स्वागत गर्नु भएको सो कार्यक्रममा टोलीको प्रमुख प्रशिक्षक एवं व्यवस्थापक  वीरकृष्ण महर्जन प्रतियोगिताको बारेमा  र गिनिज बुकमा नाम लेखाउन सफल फुटबल खेलाडी सजन डंगोलले आ–आफ्नो अनुभबको बारेमा बताउनु भएको थियो ।

थप फोटोकोलागि लिंकमा क्लीक गर्नु होस ।

https://www.facebook.com/media/set/?set=a.122122658378435116&type=3
 

जिफन्ट सहयोग समूह कतारले असोज १८ गते कतार स्थित अल्खोर एरियामा सम्पन्न भेलाले रबिन रूचालको अध्यक्षतामा ११ सदस्य अल्खोर एरिया कमिटी गठन गरेको छ ।

जिफन्ट सहयोग समूह कतारका अध्यक्ष समुन्द्र खड्काको अध्यक्षता तथा  प्रमुख सल्लाहकार तथा प्रवासी नेपाली मञ्च कतारका सचीव शेषराज तिमल्सिनाको प्रमुख आतिथ्यतामा सम्पन्न भेलामा नेपाल पत्रकार महासंघ कतार शाखाका उपाध्यक्ष अर्जुन पौडेल, जिफन्ट सहयोग समूह उपाध्यक्ष गुमान सिं बिश्वकर्मा, आर्थिक सचीव सल श्रेष्ठ लगायत अतिथि रहनु भएको भेलाको संचालन कार्यबाहक महासचिव लोक जोगीले र सचिव गिरि प्रसाद दर्लामीले स्वागत गर्नु भएको थियो । 
 

नेपाल गृह श्रमिक ट्रेड युनियन (हुन) को आयोजनामा 'घरेलु श्रमिक पन्जिकरण तथा योगदान आधारित सामाजिक सुरक्षा सम्बन्धी १ दिने राष्ट्रिय कार्यशाला असोज १९ गते अनामनगर स्थित जिफन्ट  स्कुलमा सम्पन्न भएको छ ।

कार्यशाला प्रमुख अतिथि नेपाल ट्रेड युनियन महासंघ (जिफन्ट) अध्यक्ष बिनोद श्रेष्ठले योगदान आधारित सामाजिक सुरक्षामा सबै श्रमिकहरु सहभागी हुनको निम्ति युनियनको स्थानीय तह सम्मको कमिटीहरु सक्रिय हुनु  पर्ने भन्नु हुँदै केही चुनौतीहरू बिचमा पनि महासंघले सामाजिक सुरक्षा लागु गर्न अगुवाई गर्दै अनौपचारिक क्षेत्रबाट सुरू गर्दै अनौपचारिक क्षेत्र र हाल बैदेशिक रोजगारको क्षेत्र सम्म समेत्न सफल भएको बताउनु भयो। 

जिफन्टले योगदानमा आधारीत सामाजिक सुरक्षा कोषमा चार बर्ष भित्र 'मिसन टु मिलिनियम 'अर्थात २० लाख श्रमिकहरूलाई सहभागी गराउने अभियान अन्तर्गत अन्तरगत हाल १६ लाख भन्दा बढी श्रमिकहरू सुचिकृत भैसकेको बताउँदै अब कोषलाई सेवा सुबिधा र व्यवस्थापनको हिसाबले समयनुकुल बनाउँदै लैजानु पर्नेमा जोड दिनु भयो। 

कार्यशालामा बागमती प्रदेस सभा सदस्य तथा हुनका संस्थापक अध्यक्ष माननीय बिन्दु श्रेष्ठले आफुहरुको पहलमा प्रदेस सरकारले आफ्नो नीति तथा कार्यक्रममा योगदानमा आधारीत सामाजिक सुरक्षालाई समावेश गरी बजेट विनियोजन गरेको बताउनु हुँदै यस्लाइ अझ प्रभावकारी बनाउन आगामि दिनहरुमा ट्रेड युनियनहरूसंग  थप छलफल र सहकार्यमा अगाडी बढ्ने प्रतिबद्धता जनाउनु हुँदै बागमती प्रदेस तहमा श्रम सल्लाहाकार परिषद गठन गर्न पहल भैरहेको र यसमा श्रमिकको क्षेत्रबाट ट्रेड युनियनहरु पनि सहभागी गराउन पहल गरिरहेको समेत जानकारी दिनु भयो । 

त्यसैगरी बागमती प्रदेस सभा सदस्य माननीय सकुन्तला श्रेष्ठ, माननीय बाल कुमारी बि.क र माननीय माया कार्कीले श्रम र श्रमिकको पक्षमा हरपल कम गरिरहेने प्रतिबद्धता ब्यक्त गर्नु हुँदै यस प्रकारको कार्यक्रमले आफुहरु नीति निर्माण तहमा श्रमिकका मुद्धाहरूलाइ उत्थान गर्न मद्दत मिल्ने बताउँदै कार्यक्रममा सहभागी गराएकोमा खुशि ब्यक्त गर्नु भएको थियो ।

कार्यशालामा योगदान आधारित सामाजिक सुरक्षा कोषको सहायक निर्देशक राधिका निरौलाले घरेलु श्रमिक तथा अनौपचारिक र स्वरोजगार श्रमिकहरु कोषमा सहभागी हुनको निम्ति हाल भएको ब्यवस्था र प्रक्रियाको सम्बन्धी र योगदान आधारित सामाजिक सुरक्षा कोषमा सुचिकृत भए पछी पाउने सुविधाहरूको बारेमा जानकारी गराउनु भएको थियो । 

हुन केन्द्रीय अध्यक्ष चन्द्र सागर लामाले कार्यशालाको अध्यक्षता गर्नु हुँदै युनियनको वर्तमान अवस्था र आगामी योजनाकाबारे  जानकारी गराउनु भएको थियो ।

हुन महासचिव ज्ञानुमाया क्षेत्रीले सन्चालन गर्नु भएको उक्त कार्यशालामा  जिफन्ट उपध्यक्षहरु बिदुर कार्की , जितेन्द्र श्रेष्ठ महासचिव लक्ष्मण शर्मा सचिवहरु कृष्ण केसी र तारानिधि पन्त सहभागी रहेको थियो।

 

नेपाल ट्रेड यूनियन महासंघ (जिफन्ट)ले टोखा नगरपालिकामा सरसफाई तथा सरसफाई वर्गीकरण क्षेत्रमा कार्यरत श्रमिकहरूलाई असोज १९ गते व्यवसायजन्य सुरक्षा र स्वास्थ्य (OSH) सम्बन्धी तालिम सम्पन्न गरेको छ ।

जिफन्ट उपाध्यक्ष विदुर कार्कीले तालिमको उद्देश्यवार प्रकाश पार्नु भएको उक्त तालिममा सहभागीहरूलाइ कार्यस्थलको स्थीतीको अध्यनका बारेमा डा. पद्म खतिवडाले सहजिकरण गर्नु भएको थियो भने व्यवसायजन्य सुरक्षा र स्वास्थ्य विषयमा साजन राना मगर र सुनिता तामाङ्गले प्रशिक्षण दिनु  भएको थियो कार्यक्रममा  जिफन्टका राष्ट्रिय कमिटी सदस्य ठाकुर कुमार श्रेष्ठले समापन मन्तब्य राख्नु भएको थियो ।
 

अन्तराष्ट्रिय श्रम संगठन (आइएलओ)ले जलवायु परिवर्तनको प्रभावले नेपालका नागरीकले सामाजिक सुरक्षाको चुनौती बढेर आएको जनाएको छ । आइएलओले नेपालले जलवायु परिवर्तनलाई सम्बोधन हुने गरी सामाजिक सुरक्षाको प्रत्याभूति गर्नुपर्नेमा जोड दिएको छ ।

‘वातावरणीय कार्य र संक्रमणको लागि विश्वव्यापी सामाजिक सुरक्षा: विश्वव्यापी समाजिक सुरक्षा प्रतिवेदन २०२४–२६ को एसिया–प्रशान्त क्षेत्रीय प्रतिवेदन’ जारी गर्दै आइएलओले सामाजिक सुरक्षाको प्रत्याभूति गर्न नेपाल दक्षिण एसियाको तुलनामा निकै सुस्त गतिले अगाडि बढेको जनाएको छ ।

आइएलओका नेपाल प्रमुख नुमान ओजकनले पर्याप्त सुविधा र पूर्ण सुरक्षालाई समेटी नेपालले तुरुन्तै विश्वव्यापी सामाजिक सुरक्षाको प्रत्याभूति गर्नुपर्ने बताए । ‘न्यायसंगत, दिगो आर्थिक विकास र हरित भविष्यको लागि नेपालले सामाजिक न्यायमा प्रभावकारी ल्याउन सरकार र नागरिकबिच सामाजिक संवादको नवीकरण गर्न जरुरी छ,’ उनले भने ।

नेपालले केही वर्षदेखि थालेको सामाजिक सुरक्षा केही बढेपनि अपर्याप्त रहेको आइएलओको प्रतिवेदनमा उल्लेख छ ।

प्रतिवेदनले जलवायु परिवर्तनको प्रभावबाट एसिया–प्रशान्त क्षेत्रका नेपाल सहित १६ देश सबैभन्दा बढी जोखिममा रहेको जनाएको छ ।