नेपाल यातायात स्वतन्त्र मजदुर संगठन गोरखा जिल्ला कमिटिले असोज १३ गते एक विज्ञप्ती जारी गर्दै  गत १० गतेबाट सुरु भएको अविरल वर्षाका कारण वाढी–पहिरो, डुवान, सवारी दुर्घटना र विभिन्न क्षेत्रमा राजमार्ग अवरुद्द भई परेको असरले भएको क्षतीबारे दुख व्यक्त गरेको छ । 

साथै गोरखा जिल्लाको धार्चे गाउपालिका लापवेशीबाट सदस्य मदन दमाईले चलाएको बा ४ ख २२७० को यात्रु बाहक बस काठमाडौं जाने क्रममा धादिङ जिल्लाको झ्याप्ले खोलामा पहिरोले पुरिएको अवस्थामा चालक, सह-चालक र यात्रु सहित पांच जना मृत अवस्थामा भेटिएकोले सम्वन्धित निकायले तत्काल उद्धार तथा राहतको व्यवस्था गर्न जोडदार माग गरेको छ ।

नेपाल ट्रेड युनियन महासंघले (जिफन्ट)ले वक्तव्य जारी गर्दै यही असोज १० गते रातीदेखि अविरल वर्षा तथा वाढी पहिरोको कारणले देशका विभिन्न भागमा व्यापक धनजनको क्षति र चाडबाडको मुखमा यस्तो प्राकृतिक प्रकोपबाट दैनिक गुजारा गर्ने श्रमजीविवर्गहरुलाई प्रत्यक्ष प्रभाव प्रति सिङ्गो महासंघ परिवार स्तब्ध भएको जनाएको छ । विपत्तिबाट ज्यान गुमाउनु भएकाप्रति हार्दिक श्रद्धाञ्जली व्यक्त गर्दै घाइतेहरूको शीघ्र स्वास्थ्य लाभको पनि कामना गरेको छ ।

वाढी पहिरोबाट पीडितहरूको तत्काल राहत तथा उद्धारको व्यवस्था र सडक अवरूद्धका कारण यात्रुहरुको बिचल्लीमा परेकाहरूको उचित व्यवस्थापन गर्न सम्बन्धित निकाएको ध्यानाकर्षण गराउँदै जिफन्टको सम्पुर्ण संरचना, आबद्ध युनियन र कार्यकर्ताहरूलाई राहत र उद्धारका लागि तत्कालै लाग्न समेत आह्वान गरेको छ । 

साथै जिफन्ट बिपत ब्यवस्थापन र युवा कमिटीले असोज १३ गते बाढीबाट क्षतिग्रस्त सुन्दरीघाट स्थीत सुलक्षण किर्ती बिहारमा हिलो पन्छाउने काम गरेको छ ।

त्यसैगरी जिफन्ट केन्द्रीय कार्यालयमा बसेको आकस्मिक बैठकले बाढीबाट क्षतिग्रस्त बनेको नेकपा (एमाले)को कार्यालयलाई व्यवस्थित गर्नका लागि श्रमिक टोलीलाई तयारी अवस्थामा राखेको जानकारी प्राप्त भएको छ । 
 

उदयपुर सिमेन्ट उद्योग लिमिटेड, समग्र उद्योग ट्रेड युनियन (ह्वीन)नेपालको १३ औ अधिवेशनवाट रामवरण यादवको अध्यक्षतामा ९ सदस्य कमिटी गठन गरेको छ । 

जिफन्ट अध्यक्ष विनोद श्रेष्ठको प्रमुख आतिथ्यतामा भएको अधिवेशनमा जिफन्ट सचिव कृष्ण के.सी, कोशी प्रदेश अध्यक्ष किशोर धमला, (ह्वीन)नेपाल उपाध्यक्ष मनोज मगर, राष्ट्रिय कमिटी सदस्य माया भण्डारी र नेकपा (एमाले) केन्द्रिय कमिटी सदस्य अम्विका थापाको उपस्थिति रहेको थियो । 

अधिवेशनलाई सम्बोधन गर्नुहुँदै प्रमुख अतिथि श्रेष्ठले निर्वाचित कमिटीले अब यस उद्योगलाई सर्वदलीय छलफल मार्फत दीर्घकालीन समाधानका उपाएको खोजी गर्दै ऐन बमोजिमको सेवा र सुविधामा श्रमिकको पहुँच ग्यारेन्टी गर्नु पर्ने कुरा बताउनु भयो ।
 

गत शुक्रवारदेखि परिरहेको अविरल वर्षाका कारण देशका विभिन्न स्थानमा बाढीपहिरो तथा दुबानले जनजीवन अस्तव्यस्त बनेको छ । 

मानविय र भौतिक क्षति भएको विवरणहरू आईरहेका छन् । सडक अवरूद्धका कारण सयौं संख्यामा यात्रुहरुको विचल्ली भएका छन् । 

यस्तो प्राकृतिक प्रकोपको कारण अप्ठ्यारो अवस्थामा रहेका जो कोहीलाई मद्दत गर्न र नजिक पर्ने स्थानहरूमा आफु सुरक्षित हुदै सुरक्षित तरिकाले उद्दार कार्यमा जुट्न नेपाल ट्रेड युनियन महासंघ जिफन्टका कार्यकर्ता तथा सदस्यहरूलाई परिचालन गर्न सम्बन्धित कमिटीहरूलाइ निर्देशित गरीएको छ । प्रस्तुत छ जिफन्ट टोलीद्वारा असोज १२ गते अपरान्ह टेकु, दोभानबाट उद्दार गरिएको दृश्य ।

नेपाल यातायात स्वतन्त्र मजदुर संगठन एयरपोर्ट मिटर ट्याक्सी इकाई कमिटीले बा २ ज १९२३ का ट्याक्सी चालक अमर सुनुवारकी क्यान्सर पीडित श्रीमति लक्ष्मी सुनुवारको उपचारका लागि १ लाख ६० हजार ५ सय ६५ रुपैया सहयोग गरेको छ ।

असोज ११ गते आयोजित कार्यक्रममा संगठनका सदस्य अमर सुनुवारलाई अध्यक्ष भीमज्वाला राईले उक्त रकम हस्तान्तरण गरेको थियो । 
 

बिश्व पर्यटन दिवसको सन्दर्भमा जिफन्ट आबध्द–यूनिट्राभ  र  नेस्वहोमयुले पर्यटन र शान्ति नाराका साथ असोज ११ गते जिफन्ट स्कुलमा नेपाली राष्ट्रिय पर्वहरू बडा दशै, तिहार, नेपाल सम्बत ११४५ तथा छठ पर्वको शुभकामना अदान–प्रदान कार्यक्रम आयोजना गरेको छ । 

प्रमुख अतिथी जिफन्ट अध्यक्ष विनोद श्रेष्ठले कार्यक्रममा शुभकामना दिनु हुंदै जलवायु परिवर्तनमा नेपालको भूमिका नरहे पनि त्यसको प्रत्यक्ष असरले गरिखाने श्रमिकहरूले ठूलो क्षति ब्यहोरीनु परेको बताउनु भयो ।

पर्यटन क्षेत्रमा भएका १०% प्रतिशत सेवा शुल्क कटौती, आउट सोर्स, तालिमे श्रमिकलाई तलव र योगदानमा आधारित सामाजिक सुरक्षा जस्ता समस्या हल गर्न सम्बन्धित निकायसँग छलफल र परामर्श गर्नु पर्नेमा जोड दिनु भयो । 

युनिट्राभ अध्यक्ष सुमन पराजुलीको अध्यक्षतामा नेस्वहोमयु महासचिब कमल घिमिरेले संचालन गर्नु भएको कार्यक्रममा जिफन्ट र आबद्घ युनियनका नेतृत्वको सहभागिता रहेको थियो ।