श्रेणी : सूचना सञ्चार
सूचित रहनुहोस्, प्रेरित रहनुहोस्। हाम्रो समाचार पृष्ठमा स्वागत छ।
बाध्यकारी श्रम उन्मुलन र ILO प्रोटोकल २९ सम्बन्धमा परामर्श
नेपाल ट्रेड युनियन महासंघ (जिफन्ट) ले पुस १४ गते बाध्यकारी श्रम उन्मुलन र ILO प्रोटोकल २९ सम्बन्धी सांसदहरूसंग जिफन्ट अध्यक्ष विनोद श्रेष्ठको अध्यक्षतामा परामर्श कार्यक्रम सम्पन्न गरेको छ ।
अध्यक्ष विनोद श्रेष्ठले जिफन्टले बाध्यकारी श्रम उन्मुलनकालागी जिफन्टले गर्दै आइरहेको कामहरूको बारेमा चर्चा गर्नु हुँदै यस सँग सम्बन्धित विषयमा चरणबद्ध रूपमा सांसदहरूसंग छलफल गर्दै आइरहेको र गर्दै जाने बताउनु भयो ।
समयको परिवर्तन सँगै श्रम बजार पनि परिवर्तन भएको र श्रम शोषणको रूप पनि परिवर्तन भएको भन्नु हुँदै अध्यक्ष श्रेष्ठले हरेक श्रम क्षेत्रमा श्रमिकको बाध्यतालाई फाइदा उठाइ बाध्यकारी श्रम गर्न बाध्य पार्ने गरेको हुनाले यसलाई उन्मुलन गरी मर्यादित रोजगारी सिर्जना गर्नकालागि जिफन्टले निरन्तर रूपमा विभिन्न रूपमा कामलाइ अगाडी बढाइरहने बताउनु भयो ।
जिफन्ट उपाध्यक्ष विदुर कार्कीले बाध्यकारी श्रम उन्मुलन र ILO प्रोटोकल २९ का सम्बन्धमा र जिफन्टको धारणा प्रस्तुत गर्नु भएको सो कार्यक्रममा नेकपा (एमाले)का माननीय जुली महत्तो, राष्ट्रिय स्वतन्त्र पार्टीका माननीय हरि ढकाल, समावेशी आयोगका माननीय हरीदत्त जोशी, माननीय मदुसुदन पौडेल, जिफन्ट बरिष्ठ युनियनकर्मी संजालका अध्यक्ष बिना श्रेष्ठ, अन्टुफका उपाध्यक्ष धन बहादुर विकले बाध्यकारी श्रमको बारेमा आ–आफ्नो बिचार व्यक्त गर्नु भएको थियो ।
मेडिकल कलेजको आन्दोलन श्रमजीवी वर्गको न्याय पूर्ण आन्दोलनः अध्यक्ष बिनोद श्रेष्ठ
नेपाल ट्रेड युनियन महासंघ जिफन्टले लर्ड बुद्ध एजुकेशनल एकेडेमीद्वारा संचालित नेपालगन्ज मेडिकल कलेजमा जारी आन्दोलनप्रति ऐक्यबद्धता जनाउँदै तत्काल श्रमिकहरूको जायज मागलाइ सम्बोधन गर्न ब्यवस्थापकलाई सचेत गरेको छ ।
अध्यक्ष श्रेष्ठले संसारमा कहिले पनि न्याय र सत्यले हारेको इतिहास नभएको भन्दै यस मेडिकल कलेजको श्रमिक आन्दोलन पनि श्रमजीवी वर्गको न्याय पूर्ण आन्दोलनमा रहेको हुनाले कुनै पनि शक्तिले परास्त गर्न नसक्ने ढिलो वा चाँडो श्रमजीवी वर्गको न्यायपूर्ण संघर्षको जित निश्चित रहेको बताउनु भयो ।
वर्तमान श्रम कानुनले दिएको अधिकारलाई प्रयोग गर्दै व्यवस्थापन समक्ष संस्थामा क्रियाशील युनियनबाट असार ४ गते श्रम ऐन २०७४ को परिच्छेद १९ को दफा ११६ बमोजिम ७ बुँदे मागपत्र पेश गरे पछि व्यवस्थापन पक्षबाट बेवास्ता गरेको कारण श्रम कार्यालय नेपालगन्जमा दुई पटक वार्ता भयो तर पनि समाधान भएन त्यस पछि श्रम तथा व्यवसायजन्य सुरक्षा विभागमा समेत छलफल भयो त्यहापनी समाधान नभको भन्दै अध्यक्ष श्रेष्ठले व्यवस्थापन पक्षबाट देखाएको गैरजिम्मेवारपनको नतिजा नै यो आन्दोलन रहेको बताउनु भयो ।
अध्यक्ष श्रेष्ठले आन्दोलन श्रमिकहरूको रहर नभएको भन्नु हुँदै आन्दोलनलाइ निस्तेज पार्न विभिन्न तिकडमहरू हुनसक्छ त्यसबाट तपाइहरूको न्यायपूर्ण आन्दोलन सतिसाल झैँ अभिने विश्वास सहित तपाइहरूको आन्दोलनमा नेपालको ट्रेड युनियन मात्र नभई अन्तराष्ट्रिय ट्रेड युनियन आन्दोलको पनि साथ रहेको बताउनु भयो ।
नेपालगन्ज मेडिकल कलेजका आन्दोलनरत कर्मचारी युनियनहरूले मन्त्री प्रदीप पौडेललाई ज्ञापन पत्र बुझाए ।
नेपालगन्ज मेडिकल कलेजमा विगत मंसिर २६ गते देखी आन्दोलनरत कर्मचारी युनियनहरूले नेपाल सरकारका स्वास्थ्य तथा जनसंख्या मन्त्री माननीय प्रदीप पौडेललाई पुस ८ गते ज्ञापन पत्र बुझाएका छन् ।
व्यवस्थापन पक्षसँग २०८१ असार ४ गते ७ बुँदा र ४५ उपबुँदा मागपत्र राखेर व्यवस्थापन पक्षसँग पटकपटक वार्ता बसेपनि निष्कर्षमा नपुगेपछि कानुनी प्रक्रिया पुर्याएर आन्दोलनमा गएका थिए ।
मन्त्री पौडेलले ज्ञापन पत्र बुझ्दै हामीलाई यहाँको आन्दोलनको विषयमा थाहा भएको र छिटोभन्दा छिटो टुंगोमा पुर्याउन पहल गर्ने बताउनु हुँदै मंसिर २७ गते गरेको निर्णय पहिलेका मन्त्रीले गरेको निर्णय भएको र आफूले निर्णय कार्यान्वयन गर्न लागेको मन्त्री पौडेलले बताउनु भएको छ ।
त्यसैगरी स्वास्थ्य क्षेत्रमा काम गर्ने कर्मचारीहरू अन्य निजामती कर्मचारीहरू भन्दा भिन्न भएको हुदा उनीहरूको सेवा सुविधा फरक हुनुपर्ने अर्थात धेरै हुनुपर्ने र मन्त्रालयको सचिव स्तरीय निर्णय सरकारी, निजी, सामुदायिक सबै अस्पतालमा लागू गरिने मन्त्री पौडेलले बताउनु भएको आन्दोलन केन्द्रीय परिचालन कमिटीको संयोजक रत्ना गिरीले जानकारी दिनु भएको हो ।
स्वास्थ्य तथा जनसंख्या मन्त्री पौडेल बाँकेको भेरी अस्पतालमा सिकलसेसका बिरामीको उपचारको लागि बनेको छुट्टै वार्डको उद्घाटन गर्न नेपालगन्जमा आएको मौका पारेर आन्दोलनरत कर्मचारीहरूले ज्ञापन पत्र बुझाएका थिए ।
उक्त ज्ञापन पत्र बुझाउने क्रममा वार्ता टोलीका सदस्य नारायण प्रसाद पोखरेलले ज्ञापन पत्र पढेर सुनाउनु भएको थियो भने वार्ता टोलीका संयोजक रत्ना गिरी, सदस्य यम बहादुर खड्का र अनिता थापाले संयुक्त रूपमा हस्तान्तरण गर्नुभएको थियो ।
जुगकाटेमयूले ३८ औँ स्थापना दिवस मनायो
जुट गार्मेन्ट कार्पेट टेक्सटायल मजदुर युनियन नेपाल जुगकाटेमयूको ३८ अं स्थापना दिवसको सन्दर्भमा पुस ८ गते बारा जिल्लाको परवानीपुरमा एक कार्यक्रमको आयोजना गरेको छ ।
जुगकाटेमयु केन्द्रीय अध्यक्ष अर्जुन अधिकारीको अध्यक्षतामा सम्पन्न सो कार्यक्रममा जिफन्ट मधेस प्रदेश अध्यक्ष कमलेश झा प्रमुख अतिथि रहनु भएको थियो भने जुगकाटेमयू उपाध्यक्ष अमर यादव, जिफन्ट मदेश प्रदेश सचिव मुक्ति चौधरी, जिल्ला सचिव श्यामबाबु पटेल लगायत का नेताहरूको सहभागीता रहेको कार्यक्रममा जुगकाटेमयू त्रिवेणी सेन्थेटिक्स प्रतिष्ठानका अध्यक्ष रामेश्वर महत्तोले स्वगत गर्नु भएको थियो ।
योगदानमा आधारित सामाजिक सुरक्षा कार्यान्वयन ट्रेड युनियन आन्दोलनको सफलता: अध्यक्ष विनोद श्रेष्ठ
नेपाल ट्रेड युनियन महासघ (जिफन्ट)का अध्यक्ष विनोद श्रेष्ठले योगदानमा आधारित सामाजिक सुरक्षा कार्यान्वयन गराउन सक्नु नेपालको ट्रेड युनियन आन्दोलनको सफलता रहेको बताउनु भएको छ ।
संयुक्त ट्रेड युनियन समन्वय केन्द्र (जेटियुसिसि) सुदुरपश्चिम प्रदेश समन्वय समितिले पुस ८ गते धनगढीमा आयोजना गरेको प्रदेश स्तरीय श्रम सम्मेलनलाई सम्बोधन गर्दै अध्यक्ष श्रेष्ठ सो कुरा बताउनु भएको हो ।
अध्यक्ष श्रेष्ठले सरकारी जागिरबाट अवकास पाएका कर्मचारीले पेनशन पाए जस्तै योगदानमा आधारित सामाजिक सुरक्षा कोषमा अबद्ध भएका मध्ये देशभरका ५ सय ८७ जना मजदुरहरूले पनि पेन्सन बुझीरहेको र थुप्रै श्रमिकहरूले कोषमा अबद्ध भएबापत सेवा सुविधा प्राप्त गरिरहेको बताउनु हुँदै तथापि हामी ट्रेड युनियन कर्मीहरू योगदानमा आधारित सामाजिक सुरक्षा कोषलाई जुन गतिमा अगाडी बढाउनु पर्ने हो, जति प्रभावकारीताका साथ लानु पर्ने हो त्यस्ता सन्तोष मान्न सकिरहेको छैन भन्नु भयो ।
नेपालको श्रम बजारमा देखा परेका समस्याहरूलाई समाधान गर्न एकीकृत ट्रेड युनियनको आवश्यक रहेकोमा जोड लिनु हुँदै अध्यक्ष श्रेष्ठले म भनेर हैन हामी भनेर श्रमिक आन्दोलन सफल बनाउन सबै एक भएर अगाडी बढ्नुपर्ने बताउनु भयो ।
कार्यक्रममा नेपाल ट्रेड युनियन महासंघ (जिफन्ट) सहकारी प्रबन्ध विभाग संयोजक देव बहादुर बम, प्रदेश अध्यक्ष जित बहादुर मल्ल, जेटीयुसिसिका बोर्ड सदस्य लगायत जेटीयुसिसिका स्थानीय नेताहरू सहभागी रहेको थियो ।
सुदूरपश्चिम प्रदेशमा जिफन्ट कायाकल्प अभिमुखीकरण कार्यक्रम सम्पन्न
नेपाल ट्रेड युनियन महासंघ (जिफन्ट) सुदूरपश्चिम प्रदेशको आयोजनामा जिफन्ट कायाकल्प अभिमुखीकरण कार्यक्रम पुस ८ गते धनगढीमा सम्पन्न भएको छ ।
जिफन्ट सुदूरपश्चिम प्रदेश अध्यक्ष जित बहादुर मल्ल को अध्यक्षतामा जिफन्ट अध्यक्ष विनोद श्रेष्ठको प्रमुख अतथ्यमा सम्पन्न अभिमुखीकरण कार्यक्रममा अभियानको उदेश्य, स्वरुप, संरचना, कार्य अवधि, अभियानभित्र गरिने कार्य र अनुगमनका आधारहरूका बारेमा प्रकाश पार्नु भएको थियो ।
जिफन्ट राष्ट्रिय कमिटी सदस्य सुन्तली चौधरी, जिफन्ट सहकारी प्रबन्ध विभाग संयोजक देव बहादुर बम, सदस्य चन्द्र राम बि.क.लगायत प्रदेशका पाली स्तरका नेताहरूको सहभागिता रहेको कार्यक्रमको संचालन प्रदेश सचिव चन्द्र प्रकाश गैह्रेले स्वागत प्रदेश उपाध्यक्ष ठक्कर विष्ठले गर्नुभएको थियो ।
