उत्पादन र उत्पादकत्वको बिस्तार आन्तरिक रोजगारीको दिगो आधार भन्ने मूल नाराका साथ राष्ट्रिय श्रम तथा रोजगार सम्मेलन २०८१ काठमाण्डैमा फागुन २७ गते सम्पन्न भएको छ ।

सम्मेलनको दोस्रो दिनको प्लेनरी सत्रमा जिफन्ट उपाध्यक्ष सीता लामाले वैदेशिक रोजगारी बाध्यता हैन रहरको विषय बनाउनु पर्नेमा जोड दिनु भएको छ ।

उपाध्यक्ष लामाले वैदेशिक रोजगारमा जाने श्रमिकहरू योगदानमा आधारीत सामाजिक सुरक्षामा राम्रो सङ्ख्यामा आबद्ध भएको भए पनि तिनीहरूलाई निरन्तरताकोलागि योजना बनाउनु पर्ने भन्नु हुदै वैदेशिक रोजगारबाट फर्केका श्रमिकहरूको विप्रेषण र सिपलाई उपयोग गर्न नीतिगत रूपमा ध्यान दिन आवश्यक रहेको बताउनु भएको छ ।  

सम्मेलनले १६ बुँदे काठमाडौँ घोषणापत्र जारी गर्दै आन्तरिक रोजगार प्रवर्द्धन दशकका क्रियाकलाप, आगामी आवधिक योजना, वार्षिक नीति कार्यक्रम तथा बजेटमा समावेश गरी कार्यान्वयन गर्दै लगिने जनाएको छ । 

घोषणापत्रमा सरकारी क्षेत्रको सहजीकरण र निजी क्षेत्रको नेतृत्वमा तुलनात्मक लाभका नवीनतम् एवं उदीयमान क्षेत्रहरूमा लगानी अभिवृद्धि गरी आन्तरिक रोजगारी प्रवर्द्धन गरिने, श्रम बजारको मागको आधारमा सिपयुक्त जनशक्ति तयार गर्नकोलागि राष्ट्रिय व्यावसायिक प्रशिक्षण प्रतिष्ठान र निजी क्षेत्रका रोजगारदाताहरूसँग समन्वय एवं सहकार्य गरीने, औपचारिक तथा अनौपचारिक क्षेत्रमा रहेका श्रमिकहरूलाई सामाजिक सुरक्षा कोषमा आबद्ध गर्दै सामाजिक सुरक्षा सुनिश्चितता सहितको पेन्सनेवल समाजको निर्माण गरिने, सामाजिक सुरक्षा कोषको रकमलाई उच्च प्रतिफलयुक्त लगानीको माध्यमबाट राष्ट्रिय पुँजी निर्माण, विकास र परिचालन गरी श्रमिकहरूको कल्याण अभिवृद्धि गरिने उल्लेख छ ।

सम्मेलनले स्थानीय तहमा रहेका रोजगार सेवा केन्द्रहरूको सुदृढीकरण प्रविधिको अधिकतम प्रयोग गरी रोजगारदाता र श्रमिकका लागि साझा सूचना केन्द्रको रूपमा दिगो हुने गरी विकास गरिने जनाएको छ ।

घोषणापत्रमा श्रम आप्रवासनको व्यवस्थापन तथा पुनः एकीकरणका लागि 'श्रमिकबाट उद्यमी' बनाउन विशेष वित्तीय व्यवस्थापन परिचालनसमेत गरी राष्ट्रिय कार्यक्रम सञ्चालन गरिने उल्लेख छ । 

वैदेशिक रोजगारीबाट फर्किएका कामदारको सिपको प्रमाणीकरण गरी उनीहरूले आर्जन गरेको सीप, पुँजी र अनुभवलाई उत्पादनशील कार्यमा उपयोग गरी उद्यमशीलताको थप विस्तार गर्ने र प्रभावकारी श्रम कूटनीतिमार्फत वैदेशिक रोजगारलाई व्यवस्थित, सुरक्षित र मर्यादित बनाउँदै बाध्यात्मक रूपमा वैदेशिक रोजगारमा जानुपर्ने अवस्थाको अन्त्य गर्न नीतिगत तथा कानुनी सुधार गरिने उल्लेख गरेको छ ।

थप फोटोकोलागि तलको लिंकमा क्लीक गर्नुहोस् ।

https://www.facebook.com/media/set/?set=a.122143936580435116&type=3
 

बागमती प्रदेश, मकवानपुर जिल्लाको भीमफेदी गाउँपालिकाले अनौपचारिक क्षेत्रका थप ९९ जना श्रमिकलाई सामाजिक सुरक्षा कोषमा आबद्ध गराएको छ ।

फागुन २६ गते गाउँपालिकाले आयोजना गरेको कार्यक्रम थप श्रमिकलाई बागमती प्रदेशका मुख्यमन्त्री बहादुर सिंह लामाले कोषमा आबद्धता भएको परिचय पत्र हस्तान्तरण गरेको थियो । 

भीमफेदीले २०८० र २०८१ दुई वर्षमा १ सय ९७ जनालाई कोषमा समावेश गराइएको गाउ पालिका अध्यक्ष हिदम  लामाले जानकारी दिनु भएको छ ।
 

उत्पादन र उत्पादकत्वको बिस्तार आन्तरिक रोजगारीको दिगो आधार भन्ने मूल नाराका साथ राष्ट्रिय श्रम तथा रोजगार सम्मेलन २०८१ काठमाण्डैमा फागुन २६ गते देखि सुरु भएको छ ।

सम्मेलनको उद्घाटन गर्नु हुदै सम्माननीय प्रधानमन्त्री केपी शर्मा ओलीले उद्यमी विकास भएमा मात्र रोजगारको विकास हुने भए पनि श्रमिकहरूलाई जिउन पुग्ने ज्याला नभए सम्म उत्पादन र उत्पादकत्वको बिस्तार नहुने बताउनु भएको छ ।

श्रमशक्तीको विकासबाट मात्र उत्पादन र उत्पादकत्व बिस्तार हुने हुनाले उद्यमीहरू परम्परागत नभई आधुनिकतालाई अत्मासातगरी अगाडी बढ्न सके मात्र प्रगति हुने प्रधानमन्त्री केपी शर्मा ओलीले बताउनु भएको छ ।

उद्धधाटन कार्यक्रममा श्रम, रोजगार तथा सामाजिक सुरक्षा मन्त्री शरदसित भण्डारी र उद्योग तथा आपूर्ति मन्त्री दामोदर भण्डारीले उत्पादन र उत्पादकत्वको बिस्तार र रोजगारीको दिगो आधार तयार गर्ने बारेमा मन्तव्य राख्नु भएको थियो ।

उद्धधाटन कार्यक्रम पछि भएको प्लेनरी सत्रमा जिफन्ट अध्यक्ष बिनोद श्रेष्ठले नेपाली जनताको निर्वाहमुखी रोजगारीको विकल्पको खोजी गरी स्वरोजगारी विकाश, शीप अभिवृद्धि र उद्यमशीलता विकाश गर्दे नेपालमा विदेशी कामदारको संख्या घटाउने रणनीतिको तर्जुमा गर्न जरुरी रहेको बताउनु भएको छ ।

अध्यक्ष श्रेष्ठले श्रमिकको जीवन सुरक्षाको प्रत्याभुती दिलाउन जरुरी रहेको भन्नुहुँदै आम रूपमा योगदानमा आधारीत सामाजिक सुरक्षाको विषय कार्यान्वयनको अभावमा देश भित्रको रोजगारीवाट युवा शक्तिले सुरक्षित महसुस गर्न नसकेको कारणले श्रम क्षेत्रमा श्रमिक अभाव देखिन थालेको बताउनु भएको छ ।  

थप फोटोकोलागि तलको लिंकमा क्लीक गर्नुहोस् ।

https://www.facebook.com/media/set/?set=a.122143927268435116&type=3
 

नेपाल स्वरोजगार व्यापार श्रमिक संघ (नष्ट) गोकण्श्वर नगरपालिका ६ नं वडा कमिटीको फागुण २५ गते सम्पन्न छैटौं अधिवेशनले दिनेश राउतको अध्यक्षतामा ९ सदस्यीय इकाई कमिटी र राधिका खतिवडाको अध्यक्षतामा ७ सदस्यीय महिला कमिटी निर्वाचित गरेको छ । 
 

नेपाल ट्रेड युनियन महासंघ (जिफन्ट) आबद्ध नेपाल कृषि तथा बगान क्षेत्र श्रमिक संघ (फापुन) को फागुन २५ गते सिरहा जिल्लाको लहानमा जिफन्ट अध्यक्ष बिनोद श्रेष्ठले उद्घाटन गर्नु भएको छैटौँ अधिवेशनले पूर्ण केसीको अध्यक्षतामा १४ सदस्यीय कमिटी निर्वाचित गरेको छ ।

फापुनको केन्द्रीय संयोजक पूर्ण केसिको अध्यक्षतामा भएको उद्घाटन समारोहमा जिफन्ट उपाध्यक्ष बिदुर कार्की, महासचिव लक्ष्मण शर्मा, मदेश प्रदेश अध्यक्ष कमलेश झा, नेकपा एमाले मदेश प्रदेश सदस्य रिता यादव लगायतका अतिथिहरूले अधिवेशन सफलताको शुभकामना मन्तव्य राख्नु भएको थियो ।

माया भण्डारी स्वागत मन्तव्य राख्नु भएको सो अधिबेशन उद्घाटन समारोहमा पुर्व फापुनको केन्द्रीय अध्यक्ष पुर्णचन्द उपाध्याय र केन्द्रीय सदस्य बिन्दिराम मोचिलाइ सम्मान समेत गरेको थियो ।

नेपाल बिजुली, पेण्टर, प्लम्बर तथा निर्माण मजदुर युनियन (क्यूपेक नेपाल) टोखा नगर कमिटीको फागुण २४ गते सम्पन्न चौथो अधिवेशनले रामसरण पराजुलीको अध्यक्षतामा १३ सदस्य कमिटी चयन गरेको छ । 

त्यसैगरी सोही दिन क्यूपेक नेपाल मकवानपुर जिल्ला भेलाले निरु आले मगरको अध्यक्षतामा ७ सोदस्य जिल्ला महिला कमिटी गठन भएको छ । 

त्यसैगरी क्यूपेक-नेपाल बुढानीलकण्ठ नगर कमिटीको फागुण २५ गते सम्पन्न अधिवेशनले जगत रसाइलीको अध्यक्षतामा ११ सदस्य कमिटी निर्वाचित भएको छ ।