नेपाल ट्रेड युनियन महासंघ (जिफन्ट) आवद्ध नेपाल यातायात स्वतन्त्र मजदुर संगठन गण्डकी प्रदेश कमिटीको बार्हौ बैठक प्रदेश अध्यक्ष बिष्णु बहादुर खत्रीको अध्यक्षता मिति असोज २५ गते पोखरामा सम्पन्न भयो । 

जिफन्ट गण्डकी अध्यक्ष रुद्र बहादुर खत्रीको प्रमुख आतिथ्यतामा सम्पन्न बैठकले संगठन प्रदेश कमिटिको तेस्रो अधिवेशन आगामी मंसिर १३ गते आयोजना गर्ने निर्णय गरेको छ । 

बैठकलाई संबोधन गर्दै प्रमुख अतिथि खत्रीले बर्तमान परिवर्तित परिस्थितिमा संगठनको भुमिका, संगठनका नेता कार्यकर्ताको काम, कर्तब्य,अपनाउनु पर्ने तरिका, श्रमिक माथि हुन सक्ने अन्याय, अत्याचार र बिभेदका बिरुद्द शसक्त भुमिका निर्बाह गर्नुपर्ने कुरा बताउनु भएको थियो ।
 

इजरायलको तेलअभिभमा रहेको साइबर इन्टेलिजेन्स कम्पनी सायाब्राले गरेको अनुसन्धानमा नेपालमा भदौ २३ र २४ गते भएको जेनजी आन्दोलनमा झन्डै ३४ प्रतिशत अनलाइन संवाद नक्कली एकाउन्ट र एआईमा आधारित सामग्रीबाट फैलाइएको एक अनुसन्धानले निष्कर्ष निकालेको छ ।

जेनजी विद्रोहमा वास्तविक प्रयोगकर्तासँग मिसिएर जेनजी प्रोटेस्ट, वेकअप नेपालजस्ता ह्यासट्याग प्रयोग गर्दै आन्दोलनलाई अतिवादी र हिंसात्मक बनाउने दिशामा धकेल्न केही नक्कली प्रयोगकर्ताहरूले भूमिका खेलेको प्रतिवेदनमा उल्लेख छ ।
 

असोज १८ र १९ गतेको वर्षापछि डुबान तथा खोलाको बाढी उद्योगभित्र पसेर सुनसरी–मोरङ कोरिडोर र मोरङको कटहरी गाउँपालिकामा रहेका लगभग दुई दर्जन उद्योग क्षति भएको छ । 

उद्योग सङ्गठन मोरङका महाप्रबन्धक चुडामणि भट्टराईका अनुसार बाढीबाट ५० करोड रुपियाँभन्दा बढीको क्षति पुगेको प्रारम्भिक अनुमान गरिएको छ । 

उद्योगमा क्षति पुगेपछि दैनिक चार हजार दुई सय जना मजदुरलाई केही दिन होल्डमा बस्न भनिएको छ । दैनिक तीन सिफ्ट चल्ने उद्योग सञ्चालनमा आउन केही दिन लाग्ने बताइएको छ ।  

मलेसियामा न्यूनतम ज्याला र उचित बासस्थान नपाएको उजुरी गर्ने ११ नेपाली कामदारले न्याय पाएका छन् । 

मलेसियाको श्रम विभागले गत वर्ष आफ्ना कामदारहरूको कल्याण र आधारभूत आवश्यकताहरूको सुरक्षा प्रदान नगर्ने ६ सय ३७ रोजगारदाता कम्पनीलाई करीव ४० लाख रिंगेट क्षतिपूर्ति तिराएको हो । 

मलेसियाले देशभर एकैसाथ गरेको अपरेसनमा सेक्युरिटी गार्ड सप्लाईका ३५ कम्पनीहरूको निरीक्षण गरेको थियो । 

अपरेसन क्रममा ११ नेपाली कामदार बस्ने राजधानी क्वालालम्पुरमा रहेको प्लाजा महकोटाको एक इकाई पनि निरीक्षण गर्दा रोजगारदाताले नेपाली कामदारहरूलाई न्यूनतम ज्यालासहित कानुनद्वारा तोकिएबमोजिम आधारभूत सुविधा नदिएको पाइएको थियो ।

मलेसियामा गत फेब्रुअरी १ देखि न्यूनतम ज्याला १५ सय रिंगेट लागू गरेको हो तर कतिपय नेपाली सेक्युरिटी गार्डहरूले न्यूनतम तलब नपाएको र बैंक खातामा तलब जम्मा नगरिदिने गरेको गुनासो नेपाली राजदूतावाससमक्ष गर्दै आएका छन् । 

नेपाली दूतावासले न्यूनतम तलब नदिने कम्पनीको डिमान्ड प्रमाणीकरण नगर्ने नीति लिएको दूतावासले बताएको छ ।
 

पोखराको मणिपाल शिक्षण अस्पतालमा कार्यरत नर्सहरूले तलब वृद्धि लगायतका माग राखेर सुरु गरेको आन्दोलन स्थगित भएको छ ।

असोज १९ गते नर्सहरूले तलब वृद्धिलगायतका माग राखेर अस्पताल परिसरमा धर्ना र नाराबाजी गरेका थिए । 

काममा ‘ओभरलोड’ भएको र काम अनुसारको परिश्रम नपाएको भन्दै आन्दोलित नर्सहरू असोज २० गतेबाट पुनः नियमित काममा फर्किएका हुन् ।

‘हामी नर्स हौँ, मेसिन होइनौ’ भन्दै उनीहरुले अस्पताल परिसरमै नाराबाजी गरे पछी असोज १९ गते राति भएको वार्तामा ७ दिनभित्र तलब समायोजन गर्ने सहमति भएको थियो ।

१२ सयभन्दा बढी डाक्टर, नर्स र कर्मचारीहरू कार्यरत मणिपाल शिक्षण अस्पतालमा १ साताभित्र माग पूरा नभए पुनः आन्दोलनमा उत्रिने चेतावनी समेत दिइएको छ ।
 

नेपालीहरुको महानचाड बडा दशै लगतै देशभर भइरहेको निरन्तर वर्षाका कारण विभिन्न स्थानमा बाढी र पहिरो जस्ता प्राकृतिक विपद् उत्पन्न भएका छन् । यस अवस्थामा सम्पूर्ण देशवासीहरूलाई सतर्क रहि सुरक्षित स्थानमा बस्न तथा अत्यावश्यक बाहेक अन्य यात्रा नगर्न हार्दिक अनुरोध गर्दछौं ।

जबजब मुलुकमा बिपत आई पर्छ नागरिकको सहयोगी बनी उद्वार तथा पुनर्निर्माणमा जिफन्टले महत्त्वपूर्ण भुमिका निर्वाह गर्दै आइरहेको छ । 

तसर्थ कहि कतै बिपत परेको अवस्थामा बिगतका बर्षहरुमा जस्तै उद्वार र सहयोगमा खटिन देशभरि रहनु भएका जिफन्टका नेता र कार्यकर्ताहरुलाई हार्दिक अनुरोध गर्दछु र यस समयमा जिफन्टका सदस्य तथा कोहि पनि प्राकृतिक बिपतमा पर्नु भएको छ भने कार्यालयमा सम्पर्क गर्न समेत अनुरोध गर्द छौं ।