नेपाल ट्रेड युनियन महासंघ (जिफन्ट) आबद्ध नेपाल सफाइ कर्मचारी युनियनद्वारा महिला क्षमता विकास तालिम सम्पन्न गरेको छ । 

कार्तिक ९ र १० गते अनामनगरस्थित जिफन्ट स्कुलमा सञ्चालन भएको सो तालिममा संगठन निर्माण, विस्तार र परिचालन, नेतृत्व विकास तथा यसको महत्त्व, श्रम कानुन, लैङ्गिक समानता तथा सामाजिक समावेशीकरण, र सामूहिक सौदाबाजी विषयमा सहभागीहरूलाई तालिम दिएको थियो । 

सरसफाइ क्षेत्रमा कार्यरत महिला श्रमिकहरू सहभागी रहेको कार्यक्रममा जिफन्ट उपाध्यक्ष बिदुर कार्की, श्रम सम्बन्ध परिषद् सदस्य अधिवक्ता भक्ति घिमिरे लगायतले तालिम दिनु भएको थियो ।

नेपाल ट्रेड युनियन महासंघ (जिफन्ट) आवद्ध नेपाल स्वातन्त्र होटल क्यासिनो तथा रेष्टुरेन्ट मजदूर यूनियन (नेस्वहोमयु) लगायत अन्टुफ आवद्ध अखिल नेपाल होटल क्यासिनो तथा रेष्टुराँ मजदूर संघ र एनटियुसी आवद्ध नेपाल पर्यटन तथा होटल सम्बद्ध श्रमिक संघद्वारा कार्तिक १० गते संयुक्त बिज्ञप्ती मार्फत हायात रिजेन्सी होटल तत्काल मर्मत कार्य अगाडी बढाई श्रमिकहरुलाई काममा फर्काउन होटल व्यवस्थापन पक्षसंग माग गरेको छ । 

बिज्ञप्तीमा श्रमिकहरुका सम्वन्धमा कुनै पनि पक्षबाट हुने निर्णयहरु श्रम ऐन २०७४, श्रम नियमावली २०७५ र सामाजिक सुरक्षा ऐन २०७४ मा भएको ब्यवस्थाका आधारमा हुनु पर्ने भन्दै विवादको समाधान होटल व्यवस्थापन र सम्वन्धित प्रतिष्ठानका श्रमिक प्रतिनिधि र ट्रेड यूनियनहरु बिचको सम्वादबाट समाधान खोज्न होटल व्यवस्थापन पक्षसंग माग गरेको छ ।

नेपाल ट्रेड युनियन महासंघ (जिफन्ट) लुम्बीनी प्रदेशस्तरिय भेला कार्तिक १० गते जिफन्ट सभाहल बुटवलमा जिफन्ट अध्यक्ष बिनोद श्रेष्ठको प्रमुख अतिथ्यतामा सम्पन्न भएको छ ।

अध्यक्ष श्रेष्ठले बदलियको राजनीतिक परिबेशमा ट्रेड युनियन आन्दोलनको भुमिका बारेमा मन्तब्य राख्नु भएको भेलामा जिफन्ट उपाध्यक्ष कमल गोतम, सचिब तारानिधी पन्त, हरी कार्की प्रदेश अध्यक्ष हुमाकान्त काफ्ले  लगायतका अतिथीहरूले सम्बोधन गर्नु भएको थियो ।

नेपाल ट्रेड युनियन महासंघ (जिफन्ट)द्वारा बागमती प्रदेश अन्तरगत काठमाण्डौ उपत्यका स्तरीय बिस्तारित बैठक कार्तिक ८ गते जिफन्ट सभाहलमा सम्पन्न गरेको छ । 

बैठकलाइ सम्बोधन गर्दै जिफन्ट उपाध्यक्ष जितेन्द्र श्रेष्ठ  र महासचिब लक्ष्मण शर्माले बैठकको औचित्य र जिफन्टले संचालन गर्नलागेको बदलिएको राजनैतिक परिवेशमा श्रमिकसंग सम्वाद कार्यक्रम बारे प्रकाश पार्नु भएको थियो ।

बागमती प्रदेश अध्यक्ष रामहरी नेपालले संचालन गर्नु भएको बैठकमा जिफन्ट सचिब महेन्द्रलाल श्रेष्ठ, जिफन्ट राष्ट्रिय कमिटी, प्रदेश कमिटी र जिफन्ट आवद्ध युनियनका केन्द्रीय नेताहरूको उपस्थीति रहेको थियो ।
 

नेपाल ट्रेड युनियन महासंघ (जिफन्ट) आबद्ध  नेपाल बिजुली, पेण्टर, प्लम्बर तथा निर्माण मजदुर युनियन (क्यूपेक-नेपाल) पूर्व केन्द्रीय सदस्य तथा केन्द्रीय महिला कमिटी सचिव धुर्पादेवी राईको स्वास्थ्य उपचारका लागि आर्थिक सहयोग प्रदान गरेको छ । 

टाउकोमा रगत जमेको कारण बिराटनगरस्थित आर ए न्यूरो हस्पिटल कञ्नचनबारीमा अप्रेशन गर्नु भएकी राईलाई जिफन्ट ऐक्यबद्धता कोषबाट २५ हजार रूपैयाँ र क्युपेक-नेपालको तर्फबाट नगद रू १६ हजार १ सय  रूपैयाँ राईकी छोरी लक्ष्मी रानालाई जिफन्ट उपमहासचिव नरनाथ लुईटेल र कोशी प्रदेश अध्यक्ष किशोर धमलाले कार्तिक ८ गते हस्पिटल पुगी हस्तान्तरण गरेको हो ।

नेपाल ट्रेड युनियन महासंघ (जिफन्ट) आवद्ध नेस्वहोमयु हायात रिजेन्सी होटल प्रतिष्ठान स्तरको ट्रेड युनियन लगायत नेपाल ट्रेड युनियन कांग्रेस र अखिल नेपाल ट्रेड युनियन महासंघ आवद्ध प्रतिष्ठान स्तरको ट्रेड युनियनहरूले कार्तिक ९ गते संयुक्त बिज्ञप्ती जारीगरी होटल प्रशासनलाई तत्काल आफ्नो निर्णय फिर्ता लिई होटल सञ्चालनमा ल्याउन तथा सबै श्रमिकको रोजगारी सुरक्षित गर्न आग्रह गरेको छ । 

गत भाद्र २३ र २४ गते भएको आन्दोलनको क्रममा होटेलमा भएको तोडफोड र आगजनीका कारण होटेलको मर्मत र पुनर्निर्माणको जोखिम तथा सुरक्षा संवेदनशिलता समेतलाइ मध्येनजर गर्दै प्रतिष्ठानमा क्रियाशिल ट्रेड युनियनसँग छलफल भई सुचना जारी गरिएको भन्ने भ्रम पुर्ण सुचना जारी गरिएको प्रती प्रतिष्ठानमा क्रियाशिल ट्रेड युनियनहरूको गम्भीर ध्यान आकर्षण भएको बिज्ञप्तीमा उल्लेख गरेको छ ।

बिज्ञप्तीमा होटलमा क्रियाशिल कुनै पनि ट्रेड युनियनसँग होटल वन्द गर्ने सर्न्दभमा कुनै छलफल, सहमती तथा समर्थन नभएको भन्दै आन्दोलनका क्रममा भएको क्षति मर्मत संभार पश्चात होटल तुरुन्त सञ्चालन गर्न सकिने अवस्था रहेको समेत स्पष्ट गरेको छ। 

आन्दोलनको क्रममा हिल्टन होटल पूर्ण रूपमा क्षतिग्रस्त हुँदा समेत आफ्ना श्रमिकहरूलाई अन्य विदेशस्थित होटलहरूमा रोजगारी सिफ्ट गरेर सुरक्षित गरेको र भाटभटेनी सुपरमार्केटले क्षतिग्रस्त शाखाहरूमा कार्यरत श्रमिकहरूलाई निष्कासन नगरी संरक्षण गरेको उदाहरणहरू सकारात्मक र श्रमिक-मैत्री अभ्यास भएको भन्दै नेपाल सरकार र सम्बन्धित निकायहरूलाई घटनाको निष्पक्ष छानबिन गरी क्षति पुर्याउने पक्षमाथि आवश्यक कारबाही गर्न र श्रमिकहरूको रोजगारी सुरक्षित गर्न अनुरोध समेत गरेको छ ।