नेपाल सरकारले सार्वजनिक क्षेत्रमा ट्रेड युनियन अधिकार कमजोर पार्ने गरी अघि सारेका कदमप्रति अन्तर्राष्ट्रिय ट्रेड युनियन संगठनहरूले गम्भीर चिन्ता व्यक्त गर्दै नेपाली श्रमिक तथा ट्रेड युनियन आन्दोलनप्रति ऐक्यबद्धता जनाएका छन्।

अन्तर्राष्ट्रिय ट्रेड युनियन महासंघ एसिया प्रशान्त क्षेत्रीय संगठन (ITUC-Asia Pacific), ग्लोबल युनियन (GUFs) तथा ट्रेड युनियन ऐक्यबद्धता सहयोग संस्थाहरू (TUSSOs) ले कार्तिक २ र ३ गते काठमाडौंमा सम्पन्न बैठकपछि संयुक्त वक्तव्य जारी गर्दै नेपालका ट्रेड युनियनहरूको अधिकार संरक्षणका पक्षमा आवाज उठाएका हुन्।

कार्तिक २ र ३ गते जारी संयुक्त वक्तव्यमा प्रशासनिक सुधार, राजनीतिक तटस्थता र प्रशासनिक कार्यक्षमता अभिवृद्धिको नाममा स्वतन्त्र ट्रेड युनियनलाई कमजोर बनाउने, श्रमिकका मौलिक अधिकारमाथि प्रतिबन्ध लगाउने तथा स्थापित सामाजिक संवादका संयन्त्रलाई कमजोर पार्ने काम गर्न नहुने उल्लेख गरिएको छ।

संगठित हुने स्वतन्त्रता तथा सामूहिक सौदाबाजीको अधिकार श्रमिकका आधारभूत र अन्तर्राष्ट्रिय रूपमा मान्य अधिकार भएको स्पष्ट पार्दै सरकारले कुनै पनि अवस्थामा यी अधिकारको पूर्ण सम्मान र संरक्षण गर्नुपर्ने बताएका छन्।

नेपालको संविधानले श्रमिकलाई ट्रेड युनियन खोल्ने, त्यसमा आबद्ध हुने र सामूहिक सौदाबाजी गर्ने अधिकार सुनिश्चित गरेको स्मरण गराउँदै संयुक्त वक्तव्यमा नेपालले अन्तर्राष्ट्रिय श्रम संगठन (आईएलओ) को महासन्धि नम्बर ९८ अर्थात् संगठन गर्ने अधिकार तथा सामूहिक सौदाबाजीसम्बन्धी महासन्धि अनुमोदन गरिसकेको उल्लेख गर्दै संयुक्त वक्तव्यमा संविधानले सुनिश्चित गरेका अधिकार र आईएलओ महासन्धिअन्तर्गतका अन्तर्राष्ट्रिय प्रतिबद्धता पूर्ण रूपमा पालना गर्न, सार्वजनिक क्षेत्रका श्रमिकलाई कुनै हस्तक्षेप वा विभेदबिना स्वतन्त्र रूपमा ट्रेड युनियन खोल्न, आबद्ध हुन र सामूहिक सौदाबाजी गर्न पाउने वातावरण सुनिश्चित गर्न सरकारसँग माग गरिएको छ।

श्रमिकको अधिकार र रोजगारीका सर्तहरू प्रभावित पार्ने सबै विषयमा प्रतिनिधिमूलक ट्रेड युनियनसँग अर्थपूर्ण तथा वास्तविक सामाजिक संवाद गर्नसमेत सरकारलाई आग्रह गरिएको छ।

अन्तर्राष्ट्रिय ट्रेड युनियन संगठनहरूले नेपाली ट्रेड युनियनहरूलाई श्रमिक अधिकारको रक्षा, स्वतन्त्र ट्रेड युनियन आन्दोलनको संरक्षण र सामाजिक न्यायको प्रवर्द्धनका लागि आपसी एकता, ऐक्यबद्धता र सहकार्य थप बलियो बनाउन आह्वान गरेका छन्।

वक्तव्यमा नेपालका ट्रेड युनियन आन्दोलनप्रति आफ्नो ऐक्यबद्धता निरन्तर रहने प्रतिबद्धता व्यक्त गर्दै अन्तर्राष्ट्रिय श्रम मापदण्डको संरक्षण र नेपालमा लोकतान्त्रिक ट्रेड युनियन आन्दोलन सुदृढ बनाउन सम्बद्ध संगठन तथा समग्र ट्रेड युनियन आन्दोलनलाई आवश्यक सहयोग गर्न तयार रहेको उल्लेख गरिएको छ।

https://www.ituc-ap.org/news-and-updates/joint-statement-of-the-ituc-asia-pacific-global-union-federations-and-trade-unions-solidarity-support-organisations-in-solidarity-with-nepal-trade-unions?fbclid=IwY2xjawVXlEVleHRuA2FlbQIxMQBwZG9mBXNydGMGYXBwX2lkEDIyMjAzOTE3ODgyMDA4OTIAAR-izeSRl1QttNVp7BYq0skV0CJwo51rP_uCdYRAKQxYuvZ_KWX9sJ3aAhRs1A_aem_OvMs2n7T2hBtpoF0Yi4wuw
 

नेपाल ट्रेड युनियन महासंघ (जिफन्ट)ले  श्रम आन्दोलनका ऐतिहासिक दस्तावेजहरुलाई ‘र्याकदेखि स्क्रिनसम्म’को मूलभावमा कृतिम बौद्धिकता ‘एआई’मा आधारित पुस्तकालयलाई  डिजिटलमा रुपान्तरण गरेको छ । 

जिफन्टको अर्गनाइजिङ एकेडेमीअन्तर्गत जिफन्टले सन् १९९४ मा स्थापना गरेको राष्ट्रिय श्रम स्रोत केन्द्र (एनएलआरसी)ले भौतिक पुस्तकालयका रूपमा आफ्नो यात्रा सुरु गरेको थियो । एनएलआरसीले कार्तिक १५ गते एक समरोहबीच ‘एआई’ युगको मर्मलाई आत्मसात् गर्दै श्रम आन्दोलनका बहुमूल्य भौतिक अभिलेखालयलाई एक जीवन्त डिजिटल घरमा रूपान्तरण गरेको हो ।

त्यसैगरी जिफन्टले श्रम इतिहासमा आधारित ‘द्वन्द्वदेखि सह–अस्तित्वसम्म’ नामक पुस्तकको समेत विमोचन गरेको छ । ‘श्रम आन्दोलनको परम्पराको संरक्षण गर्न, ज्ञान र मानिसबीचको सम्बन्ध स्थापित गर्न, कामको भविष्य सशक्त बनाउन, सम्पर्क गरौँ ! सिकौँ ! काम गरौँ !’ भन्ने मूल ध्येयका साथ एआईमा आधारित डिजिटल नयाँ अध्याय सुरु गरिएको जिफन्टले जनाएको छ । 

‘आज राष्ट्रिय श्रम स्रोत केन्द्रमा श्रम तथा ट्रेड युनियन आन्दोलनसँग सम्बन्धित १० हजारभन्दा बढी पुस्तक, अनुसन्धान प्रतिवेदन, आवधिक प्रकाशन, तस्बिर, भिडियो तथा अन्य महत्त्वपूर्ण सामग्रीहरूको सङ्कलन छ । यसको विस्तार निरन्तर भइरहेको छ’, जिफन्टका संरक्षक विष्णु रिमालले एआईमा आधारित दस्तावेज डिजिटलाइजेसन सम्बन्धी जानकारी गराउँदै भन्नुभयो । 

सार्वजनिक गरिएको डिजिटल घर मार्फत ट्रेड युनियन अभियन्ता, प्रशिक्षक, विद्यार्थी तथा अनुसन्धानकर्ताले आफूलाई आवश्यक ज्ञान र सूचना एउटै खोजमार्फत केही सेकेन्डमै प्राप्त गर्न सकून् भन्ने उद्देश्य जिफन्टले राखेको छ । राष्ट्रिय श्रम स्रोत केन्द्रलाई सूचनाको भण्डारमा मात्र सीमित नराखी अध्ययन, अनुसन्धान र ज्ञान आदानप्रदानको अन्तरक्रियात्मक मञ्चमा रूपान्तरण गर्ने उद्देश्यका साथ जिफन्टले– ‘ज्ञान बाँडौँ, साझेदारी विस्तार गरौँ ! ज्ञान बाँडेर नै ज्ञानको विस्तार हुन्छ !’ नारा अघि सारेको छ ।

राष्ट्रिय श्रम स्रोत केन्द्रले अन्तर्राष्ट्रिय श्रम सङ्गठन (आइएलओ)को पुस्तकालयलगायत समान प्रकृतिका ज्ञान केन्द्र, डिजिटल अभिलेखालय तथा अन्तर्राष्ट्रिय पुस्तकालयहरूसँग संस्थागत साझेदारी विकासको प्रयासलाई समेत अघि बढाएको जिफन्टले जनाएको छ ।

हाल परीक्षण चरणमा सञ्चालन भइरहेको यो एआईको प्रयोगका लागि प्रयोगकर्ताहरूले सेवा लिनका लागि नेशनल लेबर रिसोर्स सेन्टर (एलआरएस) कार्यालय अनामनगर, काठमाडौंमा उपस्थित भएर उपलब्ध सामग्री तथा सेवाहरूको उपयोग गर्न सक्नेछन् । डिजिटलीकरण प्रक्रिया अघि बढ्दै जाँदा र आवश्यक प्रणालीहरू सञ्चालनमा आएपछि केन्द्रले आफ्ना सेवाहरू एपमार्फत विस्तार गर्ने जनाएको छ । 

सुरुमा जिफन्ट ट्रेड युनियन स्कुलका शैक्षिक गतिविधिलाई सहयोग पुर्याउने उद्देश्यले यो केन्द्र स्थापना गरिएको थियो । केन्द्र क्रमशः श्रमिक शिक्षा, युवा नेतृत्व विकास तथा प्राविधिक सीप अभिवृद्धिमा सहयोग पुर्याउने प्रशिक्षण तथा स्रोत केन्द्रका रूपमा विकसित भएको थियो ।  यही परम्परालाई निरन्तरता दिँदै राष्ट्रिय श्रम स्रोत केन्द्रले अहिले श्रमको संसारप्रति समर्पित डिजिटल ज्ञान केन्द्रका रूपमा आफूलाई रूपान्तरण गर्ने महत्त्वाकाङ्क्षी नयाँ यात्रामा अघि बढेको जनाएको छ ।

कार्यक्रमका प्रमुख अतिथि आईटीयूसी–एपीका महासचिव शोया योशिदाले जिफन्टलाई यो रचनात्मक कार्यका लागि धन्यवाद दिँदै नयाँ पुस्तामा ज्ञान बाँडेको भनि प्रशंसा गर्नुभयो । महासचिव योशिदाले भन्नुभयो– मजदुरको चाहना फरक–फरक हुन सक्छन् । परस्पर सम्मान र हितका लागि लोकतान्त्रिक गरेर जाने हो । जिफन्टको यो अभियानले एसियाको ट्रेड युनियनलाई नभई संसारभरिका मजदुर आन्दोलनलाई टेवा पुर्याएको छ ।

कार्यक्रममा एजुकेशन इन्टरनेसनल एपीका क्षेत्रीय निर्देशक आनन्द सिंह, पब्लिक सर्भिस इन्टरनेसनल (पीएसआई)का क्षेत्रीय प्रमुख कन्नन, बी.डब्ल्यु.आईका अपोलिनार टोलेन्टाइन, डब्ल्यु.एस.एम.का ब्रूनो, आईटीयूसी एपीका पातुआन, सोलिडारिटी सेन्टरकी लुना रञ्जितको विशेष उपस्थिति थियो ।

जिफन्टका महासचिव लक्ष्मण शर्माले सञ्चालन गर्नुभएको कार्यक्रमको उद्घाटन मन्तव्य युएनआईका महासचिव राजेन्द्र आचार्य एलो नर्वेको तर्फबाट  ओलाभ आन्द्रेसेनले राख्नु भएको थियो । कार्यक्रमको अध्यक्षता गर्नु भएका जिफन्टका अध्यक्ष विनोद श्रेष्ठले सहभागी पाहुनाहरूलाई कृतज्ञता ज्ञापन गर्नुभएको थियो ।

कार्यक्रमको फोटोकोलागि तलको लंकमा क्लीक गर्नु होस् ।

https://www.facebook.com/media/set/?set=a.122210254070435116&type=3

https://www.facebook.com/media/set/?set=a.122210233640435116&type=3

नेपालीहरूको महान पर्व बडा दशैको तपाईं सबैलाई शुभकामना! 

 GEFONT कार्यालय १७ देखी २४ अक्टोबर सम्म दशै बिदाको लागि बन्द रहनेछ। 

आपतकालीन अवस्थामा, कृपया महासचिव लक्ष्मण शर्मालाई +९७७-९८५१०-८०८६० र बिदेश बिभाग सचिब स्मृती लामालाइ +९७७-९८५१२४८६७७  मा सम्पर्क गर्नुहोस्।

नेपाल ट्रेड युनियन महासंघ (जिफन्ट) अध्यक्ष बिनोद श्रेष्ठले संबिधान दिवस २०८३ को सन्दर्भमा भाद्र ३ गते भिडियो मार्फत  शुभकामना दिनु भएको छ । 

शुभकामना सन्देश मार्फत अध्यक्ष श्रेष्ठले नेपाली श्रमजीवी जनताको सदियौँदेखिको लोकतन्त्र, न्याय र समानताको संघर्ष तथा हजारौँ शहीदहरूको बलिदानबाट प्राप्त नेपालको संविधान, २०७२ जारी भएको ऐतिहासिक अवसरमा स्वदेश तथा विदेशमा रहनुभएका सम्पूर्ण श्रमजीवी जनसमुदायमा नेपाल ट्रेड युनियन महासंघ (जिफन्ट) तर्फबाट शुभकामना व्यक्त गर्नु भएको छ ।

अध्यक्ष श्रेष्ठले लामो संघर्ष र बलिदानबाट प्राप्त संविधान श्रमिक जनताका अधिकार, लोकतान्त्रिक मूल्य र सामाजिक न्यायको महत्वपूर्ण आधार हो। यसको प्रभावकारी कार्यान्वयन, संरक्षण र सुदृढीकरण गर्दै सामाजिक न्याय, समानता, श्रम अधिकार र समृद्धिको दिशामा अघि बढ्नु आजको आवश्यकता भएको भन्नु हुंदै संघीय लोकतान्त्रिक गणतन्त्र र संविधानले सुनिश्चित गरेका अधिकार तथा उपलब्धिहरूको संरक्षण गर्दै जनविश्वास अभिवृद्धि र समृद्ध राष्ट्र निर्माणका लागि एकताबद्ध भएर अघि बढ्न सबैमा अनुरोध समेत गरेको छ ।

संबिधान दिवस २०८३ को शुभकामना  भिडियो संलग्न छ।

https://www.youtube.com/watch?v=U8gM2GCqtgE