नेपाल ट्रेड युनियन महासंघ (जिफन्ट) आवद्ध  राष्ट्रिय सौन्दर्यकर्मी युनियन नेपाल (नाबुन) ललितपुर जिल्लाको महालक्ष्मी नगरपालिका कमिटीको भाद्र ४ गते सम्पन्न प्रथम अधिवेशनले सुधा थापाको अध्यक्षतामा ९ सदस्यीय कमिटी निर्वाचित गरेको छ।

नाबुन महालक्ष्मी नगर कमिटी अध्यक्ष पुनम थापाको अध्यक्षतामा भएको अधिवेशनमा केन्द्रीय अध्यक्ष सुजना जोशिले सौन्दर्यकर्मीहरूको हक हित र पेशागत सुरक्षाका लागी संगठनको आबश्यकता रहेको भन्नु हुंदै सौन्दर्यकर्मीहरूको दक्षता अभिवृद्धिका लागी संगठनले कार्यक्रमहरू संचालन गरी रहेको बताउनु भयो । 

अधिबेशनमा नाबुन बाग्मती प्रदेश आर्थिक सचिव सोलिना लामा, ललितपुर जिल्ला समन्वय समिती संयोजक जयन्ती रानामगर लगायतका अतिथिहरूको उपस्थित रहेको थियो । 
 

नेपाल ट्रेड युनियन महासंघ जिफन्टका अध्यक्ष विनोद श्रेष्ठले बलियो ट्रेड युनियन निर्माणका लागि माथिबाट तल आदेश दिने संगठनात्मक संस्कारभन्दा तलबाट माथि शक्ति निर्माण गर्ने अभ्यास आवश्यक रहेको बताउनुभएको छ।

डेनमार्कको ट्रेड युनियन युनाइटेड फेडेरेसन अफ डेनिस वर्कर्स अर्थात् 3F को आयोजनामा काठमाडौंमा सञ्चालन भइरहेको प्रतिष्ठान स्तरको ट्रेड युनियन व्यवस्थापनसम्बन्धी क्षेत्रीय तालिमलाई सम्बोधन गर्दै अध्यक्ष श्रेष्ठले ग्रासरुटलाई केवल स्थानीय कमिटीका रूपमा बुझ्न नहुने भन्नुहुंदै श्रमिकको कार्यस्थल, समुदाय र दैनिक जीवनसँग जोडिएको संगठन नै वास्तविक ग्रासरुट संगठन भएको बताउनु भयो।

बलियो ग्रासरुट संगठन निर्माणका लागि कार्यस्थलको नक्साङ्कन, श्रमिकको आधारभूत तथ्याङ्क संकलन, सदस्यता अभिलेख व्यवस्थापन तथा महिला, युवा र असंगठित श्रमिकको पहिचान गर्नुपर्नेमा जोड दिंदै अध्यक्ष श्रेष्ठले सदस्य संख्या मात्र बढाउँदैमा ट्रेड युनियन बलियो नहुने बताउँदै सक्रिय सदस्य निर्माणमा ध्यान दिनुपर्ने धारणा राख्नु भयो ।

ट्रेड युनियनको वास्तविक शक्ति केन्द्रीय कार्यालय वा पदाधिकारीको पदमा मात्र नभई श्रमिकको कार्यस्थल, दैनिक जीवन र सामूहिक एकतामा रहने भएकोले संगठनलाई कार्यालयमा सीमित नराखी श्रमिक रहेकै स्थानमा पुर्‍याउनुपर्ने अध्यक्ष श्रेष्ठको भनाइ थियो।
तीन दिनसम्म सञ्चालन हुने तालिममा ‘ग्रासरुटबाट बलियो ट्रेड युनियन निर्माण हाम्रो आजको आवश्यकता र भोलिको जिम्मेवारी’ विषयमा छलफल तथा अनुभव आदानप्रदान भइरहेको छ।

BWI एसिया प्रशान्त क्षेत्रीय संयोजक एपोलिनार टोलेनटीनो र 3F का बुद्धि आचार्यलगायतले सहजीकरण गरिरहनुभएको तालिममा बंगलादेश श्रीलंका र नेपालका ट्रेड युनियन प्रतिनिधिहरूको सहभागिता रहेको छ।
 

नेपाल ट्रेड युनियन महासंघ जिफन्टले प्रेश बिज्ञप्ति मार्फत नागरिक स्वतन्त्रता र कानुनी शासनको रक्षाका लागि नेपाल पत्रकार महासंघ, प्रेस चौतारी नेपाल तथा श्रमजीवी पत्रकारहरूले सञ्चालन गरेको आन्दोलनप्रति ऐक्यबद्धता जनाउँदै आफू पनि दृढतापूर्वक उभिएको जनाएको छ।

महासंघले स्थापित नियामक प्रक्रियालाई अघि बढाउँदै पत्रकार किशोर श्रेष्ठलाई बिना सर्त तुरुन्त रिहा गर्न, सञ्चारकर्मीविरुद्ध राज्यका सुरक्षा संयन्त्रको प्रयोग बन्द गर्न तथा संविधानप्रदत्त अभिव्यक्ति स्वतन्त्रताको सम्मान गर्न सरकारसँग माग गरेको छ ।

साथै, समाचार स्रोत गोप्य राख्ने पत्रकार जगतको लोकतान्त्रिक अधिकारको रक्षा गर्नसमेत जिफन्टले सरकारको ध्यानाकर्षण गराएको छ।

नेपाल ट्रेड युनियन महासंघ (जिफन्ट) अध्यक्ष विनोद श्रेष्ठले नेपालका उत्पादन, निर्माण, कृषि, स्वास्थ्य, सरसफाइ, कपडा तथा प्रशोधन उद्योगमा रासायनिक पदार्थको प्रयोग व्यापक बन्दै गएको भन्दै श्रमिकको सुरक्षा र स्वास्थ्यप्रति गम्भीर बन्नुपर्ने बताउनुभएको छ।

अन्तर्राष्ट्रिय श्रम संगठन (आईएलओ) र युवा, श्रम तथा रोजगार मन्त्रालयको साझेदारीमा साउन २९ गते आयोजित नीतिगत संवादमा अध्यक्ष श्रेष्ठले श्रम ऐन, २०७४ मा व्यावसायिक सुरक्षा तथा स्वास्थ्यसम्बन्धी व्यवस्था भए पनि कार्यस्थलको वास्तविक अवस्था भने अझै चिन्ताजनक रहेको बताउनुभयो।

उहाँले खतरनाक रासायनिक पदार्थबाट हुने जोखिमबाट श्रमिकलाई जोगाउन प्रभावकारी रोकथाम, सुरक्षित कार्यस्थल अभ्यास तथा सरकार, रोजगारदाता र ट्रेड युनियनबीच प्रभावकारी समन्वय आवश्यक रहेको बताउनुभयो।

सरकार, रोजगारदाता तथा ट्रेड युनियन, नागरिक समाज, प्राज्ञिक क्षेत्र, प्राविधिक विज्ञ तथा विकास साझेदारका प्रतिनिधिहरू सहभागी कार्यक्रममा अध्यक्ष श्रेष्ठले आईएलओका व्यावसायिक सुरक्षा तथा स्वास्थ्यसम्बन्धी महासन्धि नं. १५५ र १८७ तथा रसायनसम्बन्धी अभिसन्धिको मर्मअनुसार राष्ट्रिय नीति तथा कानुन परिमार्जन गर्नुपर्नेमा जोड दिनुभयो। साथै, Global Framework on Chemicals (GFC) लाई नेपालको राष्ट्रिय प्राथमिकतामा समेट्नुपर्ने उहाँको भनाइ थियो।

अध्यक्ष श्रेष्ठले श्रम मन्त्रालयले कार्यस्थल निरीक्षण तथा अनुगमन प्रणालीलाई प्रविधिमैत्री र प्रभावकारी बनाउँदै सुरक्षा मापदण्ड पालना नगर्ने उद्योग तथा प्रतिष्ठानलाई कानुनी दायरामा ल्याउनुपर्ने बताउनुभयो।

“सुरक्षित श्रमिक नै समृद्ध उद्योग र सबल अर्थतन्त्रको जग हो,” अध्यक्ष श्रेष्ठले भन्नुभयो, “जब कार्यस्थल सुरक्षित हुँदैन, तबसम्म उत्पादनको गुणस्तर र औद्योगिक शान्ति कायम हुन नसक्ने भन्नु हुंदै उहाँले कार्यक्रममा नीतिगत संवादबाट प्राप्त सुझाव र निष्कर्ष कागजमा मात्र सीमित नरही व्यवहारमा कार्यान्वयन हुने र स्पष्ट राष्ट्रिय कार्ययोजना निर्माण हुने विश्वास समेत व्यक्त गर्नुभयो।

अन्तर्राष्ट्रिय युवा दिवस २०२६ को अवसरमा नेपाल ट्रेड युनियन महासंघ (जिफन्ट) ले साउन २७ गते युवा श्रमिक केन्द्रित कार्यक्रम आयोजना गरेको छ।

कार्यक्रममा जिफन्ट अध्यक्ष विनोद श्रेष्ठले अन्तर्राष्ट्रिय युवा दिवसको शुभकामना दिँदै युवाको शक्ति, जोश र जाँगरलाई सकारात्मक रूपमा ट्रेड युनियन आन्दोलनमा जोड्नुपर्ने बताउनुभयो। युवा श्रमिकलाई संगठनमा आबद्ध गराउँदै आन्दोलनको नेतृत्वमा स्थापित गर्नुपर्ने उहाँको भनाइ थियो।

कार्यक्रममा रुसको अल रसियन ट्रेड युनियन अफ फिजिकल कल्चर, स्पोर्टस एण्ड ट्युरिजम अफ रसियन फेडरेशन (ट्रेड युनियन अफ स्पोर्टस अफ रूस) को आयोजनामा साउन २२ गतेदेखि मस्कोमा आयोजित बास्केटबल प्रतियोगितामा द्वितीय स्थान हासिल गर्न सफल जिफन्ट आबद्ध स्पोर्ट्स युनियन नेपालका खेलाडी तथा पदाधिकारीलाई सम्मान गरिएको थियो।

कार्यक्रममा जिफन्ट उपाध्यक्ष जितेन्द्र श्रेष्ठले युवा श्रमिकलाइ संगठनमा अवद्ध गर्न सामाजिक नेटवर्कको महत्वको बारेमा प्रकाश पार्नु भएको कार्यक्रममा प्रशिक्षकको तर्फबाट रामशरण बजगाइ र प्रशिक्षार्थिहरूको तर्फबाट शिवहरी सुवेदी र कोपिला मैनालिले मन्तब्य राख्नु भएको थियो भने जिफन्ट युवा कमिटी अध्यक्ष बिकी श्रेष्ठले स्वागत गर्नु भएको थियो ।

कार्यक्रममा जिफन्टले संचालन गरेको युथ एण्ड एसएनएस तालिममा सहभागि युवाहरूलाइ सहभागिताको  प्रमाण पत्र समेत बितरण गरेको थियो ।

थप फोटोकोलागी तलको लिंकमा क्लीक गर्नु होला ।

https://www.facebook.com/media/set/?set=a.122202028886435116&type=3

नेपाल ट्रेड युनियन महासंघ (जिफन्ट)ले अन्तर्राष्ट्रिय युवा दिवस २०२६ को सन्दर्भमा युवा सामाजिक सञ्जाल सेवासम्बन्धी तालिम सम्पन्न गरेको छ। साउन २७ गते आयोजित तालिममा युवाहरूलाई सामाजिक सञ्जालको प्रभावकारी र सिर्जनात्मक प्रयोगका साथै डिजिटल सामग्री निर्माणसम्बन्धी ब्यवहारीक ज्ञान तथा सीप प्रदान गरिएको छ ।

तालिममा रामशरण बजगाईं, मोहन पोखरेल, विनोद काफ्ले र अंकित जिसीले भिडियोका विभिन्न ढाँचा तथा उदाहरण,आवश्यक उपकरणको सेटअप, स्क्रिप्ट लेखन, भिडियो छायांकन तथा रेकर्डिङ, एआई प्रविधिको प्रयोगबाट भिडियो निर्माण तथा सम्पादन र सामाजिक सञ्जालका एल्गोरिदमलगायतका विषयमा प्रशिक्षण दिएका दिनु भएको थियो ।

पछिल्लो समय सामाजिक सञ्जाल सूचना, सञ्चार तथा जनचेतना अभिवृद्धिको प्रभावकारी माध्यम बन्दै गएको सन्दर्भमा श्रमिक युवा पुस्तालाई डिजिटल माध्यमको सही र प्रभावकारी प्रयोग गर्न सक्षम बनाउने उद्देश्यले आयोजना गरिएको तालिमले युवाहरूलाई सामाजिक सञ्जालमार्फत श्रमिकका मुद्दा, अधिकार र गतिविधिलाई प्रभावकारी रूपमा आमसमुदायसम्म पुर्‍याउन सहयोग पुग्ने जिफन्टले अपेक्षा गरिएको छ।

जिफन्ट उपाध्यक्ष जितेन्द्र श्रेष्ठ, सचिव महेन्द्र श्रेष्ठ, प्रचार विभाग सदस्य किरण मालीलगायतका नेताहरूको उपस्थितिमा सम्पन्न कार्यक्रममा जिफन्ट राष्ट्रिय युवा कमिटीका अध्यक्ष बीके श्रेष्ठले सहभागीहरूलाई स्वागत गर्नु भएको थियो ।
थप फोटोकोलागी तलको लिंकमा क्लीक गर्नु होला

https://www.facebook.com/media/set/?set=a.122202019982435116&type=3