नेपाल अटो–मेकानिक्स ट्रेड युनियन (नाटु) ले एक विज्ञप्ति जारी गर्दै नाटुको रोल्पा जिल्ला समन्वय कमिटीमा आवद्ध सदस्य सुनिल पुन मगरको हत्यामा संलग्न दोषीलाइ कडा कारवाही गर्न माग गरेको छ । 

गत साउन ५ गते हातहतियार सहित अराजक समूहको सांघातीक आक्रमणबाट मगरको मृत्यु भएको थियो । उक्त घटनामा नाटु रोल्पा जिल्ला समन्वय कमिटी अध्यक्ष कृष्ण बहादुर अधिकारी गम्भीर घाइते हुनु भएको छ । 

जिफन्टले नाटु रोल्पाका सदस्य सुनिल पुनको हत्याबाट ट्रेड युनियन आन्दोलनका इमान्दार सदस्य गुमाउनु परेकोमा दुःख ब्यक्त गरेको छ । 

शोक सन्तप्त परिवारलाई तत्काल राहत प्रदान गर्न र अपाराधीलाई गिराफ्तार गरी कानुनी कारवाहीको दायरामा ल्याउन समेत नाटुले नेपाल सरकार समक्ष जोडदार माग गरेको छ । 
 

संयुक्त राष्ट संघका महासचिव एन्टोनियो गुटरेसले पृथ्वीको बढ्दो तापक्रमको असरबाट श्रम गरेर परिवार पाल्नेहरुको सुरक्षामा जोड दिन आव्हान गर्नु भएको छ । 

साउन १०गते बिहीबार अमेरिकाको न्युयोर्कस्थित युएन मुख्यालयमा आयोजित पत्रकार भेटघाटमा बोल्दै महासचिव गुटरेसले यस्तो सन्देश दिनु भएको हो । 

उहाँले भन्नुभयो "विश्वभर बढीरहेको गर्मीको असर भने सबैलाई समान रुपमा परेको छैन । शीतलमा बस्ने सुविधाबाट बन्चित गरिब, मजदुर, विस्थापित तथा गर्भवती, बालबालिका, वृद्धवृद्धा, विकलाङ्ग व्यक्तिहरु बढी प्रभावित छन् ।" 

साउन ६ गते आइतवार अर्थात् सन् २०२४  जुलाई २१ का दिन पृथ्वीको इतिहासकै सबैभन्दा गर्मी दिनको रुपमा मापन गरिएपछि महासचिव गुटरेसले श्रमिकहरूको संकटका बारेमा संवेदनशील रहन आग्रह गर्नु भएको हो । 

अन्तर्राष्ट्रिय श्रम संगठन (आईएलओ)को एक नयाँ रिपोर्ट अनुसार विश्वभर शारीरिक श्रम गर्न सक्ने करिब ७० प्रतिशत व्यक्ति अत्यधिक गर्मीको चपेटामा परेका छन् ।

 

उदयपुर जिल्लाको चौदण्डिगढी नगरपालिका र कटारी नगरपालिकामा श्रम डेस्क स्थापना र त्यस्को कार्यान्वयन गर्ने सम्बन्धमा अन्तरक्रिया कार्यक्रम सम्पन्न भएको छ ।

नेपाल ट्रेड युनियन महासंघ जिफन्ट राष्ट्रीय कमिटी सदस्य माया भन्डारीको प्रमुख अतिथ्यतामा चौदण्डिगढी नगरपालिकामा असार १० गते सम्पन्न अन्तरक्रिया कार्यक्रममा पालिका उपप्रमुख मनिका देवि दुलाल, वडा अध्यक्ष लगायतका अतिथीहरू सहभागिता रहेको थियो । 

त्यसैगरी जिफन्ट राष्ट्रीय कमिटी सदस्य माया भन्डारी कै प्रमुख अतिथ्यतामा साउन ११ गते कटारी नगर पालीकामा आयोजित अन्तर्क्रियामा नगर उपप्रमुख गीता खड्काले आगामी नगरसभाबाट श्रम डेस्क स्थापना गर्ने निर्णय हुने वताउनु भएको छ । 

दुवै पालिकाको अन्तरक्रिया कार्यक्रम नेपाल ट्रेड युनियन महासंघ (जिफन्ट), ओरेक नेपाल र तरङ्गेणी फाउण्डेसनले संयुक्त रूपमा आयोजना गरिएको हो ।
 

जिफन्ट अवध्द युनियन युनिट्राभ गण्डकी प्रदेश कमिटी द्वारा साउन १० गते आयोजित रक्तदान कार्यक्रममा ४३ युनिट रगत संकलन भएको छ ।

गण्डकी प्रदेश सांसद गणेशमान गुरुङको प्रमुख अतिथ्यमा भएको सो कार्यक्रममा जिफन्ट गण्डकी अध्यक्ष रुद्र बहादुर खत्री, राष्ट्रिय कमिटी सदस्य पम्फा देवकोटा पहारी लगायतका अतिथिहरू सहभागि रहेको थियो । 

युनिट्राभ प्रदेश अध्यक्ष शालिकराम तिमिल्सिनाको अध्यक्षतामा सम्पन्न रक्तदान संचालन सचिव रामकृष्ण तिमिल्सिना गर्नु भएको थियो । 
 

द्वन्द्वग्रस्त मुलुक इजरायलमा सरकारले २ हजार संख्यामा केयर गिभर श्रमिक पठाइने भएपछि सरकारको चर्को आलोचना भएको छ । श्रम, रोजगार तथा सामाजिक सुरक्षा मन्त्री शरतसिंह भण्डारी र नेपालस्थित इजरायली राजदूत हनान गोडर गोल्डबर्गरबीच हालै भएको भेटवार्तामा नेपाली केयरगिभरको संख्या बढाउने सहमति भएको हो ।

गत असारमा सरकारद्वारा ८०० जनाको आवेदन खोलेकोमा नयाँ सरकार गठन लगत्तै अब यो संख्या २ हजार पुर्‍याउन सकिने सहमति भएको छ । यस्तो  सहमतिप्रति जिफन्टको गम्भिर ध्यानाकर्षण भएको छ । साथै युद्धग्रत क्षेत्रमा बैदेशिक श्रमको नाममा आफ्ना नागरिक पठाउने निर्णय तुरुन्त फिर्ता लिन पनि आग्रह गरेको छ । इजरायल–प्यालेस्टाइन द्वन्द्वमा हराएका नेपाली नागरिक विपिन जोशीको हालसम्म पनि पत्तो लागेको छैन ।

गत असार २८ गते राती गएको पहिरोसंगै आएको ढुङ्गा लागेर मृत्यु भएका चालक मेघनाथ विकको परिवारलाई नेपाल यातायात स्वतन्त्र मजदुर संगठनले साउन ९ गते १ लाख १० हजार १ सय ५ रुपैया सहयोग प्रदान गरेकोछ ।

चितवन भरतपुर महानगरपालिकाको १७ किलो भन्ने स्थानमा असार २८ गते राती गएको पहिरोसंगै आएको ढुङ्गा लागेर गम्भिर घाइते विकले बसलाई करिव ५० मिटर अगाडि पुर्याइ यात्रुहरूलाई सुरक्षित बनाएका थिए ।  

उपारको क्रममा मृत्यु भएका विकलाई मरनोपरान्त राष्ट्रिय सम्मान गर्ने तयारी भइरहेको संगठनले जनाएको छ ।