सागरनाथ वन विकास परियोजना र रतुवामाई वृक्षारोपण आयोजनामा कार्यरत श्रमिकहरूलाई श्रम ऐन, २०७४ र श्रम नियमावली, २०७५ अनुसारको सुविधाहरू माग सम्बन्धमा ६११ औ बैठकबाट गठित 
उप समितिले बुझाएको सुझावहरू कार्यान्वयन गर्न भाद्र ६ गते बसेको ६१२ औँ बैठकले निर्णय गरेको छ । 

कार्यान्वयकालागी निर्णय भए अनुसार परियोजनामा कार्यरत दैनिक ज्यालादारी चौकिदारहरूको हकमा श्रम ऐन, २०७४ जारी भएको मिति (२०७४/०५/१९) लाई आधारमानी श्रम सम्झौता भएको मान्ने उल्लेख भएको छ ।

त्यसैगरी योगदानमा आधारित सामाजिक सुरक्षा कोषमा आबद्ध गर्ने कार्यको लागि योगदानमा आधारित सामाजिक सुरक्षा नियमावली, २०७५ र सामाजिक सुरक्षा योजना संचालन कार्यविधि, २०७५ लाई आधार मानेर २०८१ भदौ महिना देखि लागू हुनेगरी प्रक्रिया अगाडि बढाउने र अवकाशको सम्बन्धमा जति वर्ष काम गरेको हो प्रत्येक वर्षको लागि १ (एक) महिना बराबरको ज्याला उपलब्ध गराउने र १ महिना बराबरको (आधारभूत पारिश्रमिक) चाडबाड खर्च बापत वर्षको एक पटक उपलब्ध गराउने निर्णय भएको हो ।

त्यसैगरी नयाँ आउने दैनिक ज्यालादारी चौकिदारहरूको हकमा नयाँ नियुक्ति भएका दैनिक ज्यालादारी चौकिदारहरूलाई श्रम ऐन, २०७४ को दफा १०को उप- दफा १ को खण्ड (ग) अनुसारको "समयगत रोजगारी" अनुसारको काममा लगाउने निर्णय भएको छ ।

स्मरण रहोस जिफन्ट सम्बद्ध युनियन नेपाल बिजुली, पेण्टर, प्लम्बर तथा निर्माण मजदुर युनियन (क्यूपेक नेपाल)ले २०७४ साल देखी श्रम कानुन कार्यान्वयनकालागि निरन्तर आन्दोलन गर्दै आइरहेको थियो ।