सडक व्यापारमा सङ्लग्न, सडकको पेटीमा बसेर वा हिड्दाहिंड्दै व्यापार गर्ने र सार्वजनिक स्थानमा पसल राखेर आफ्नो जीवन धान्ने श्रमिकहरूको युनियन हो नेपाल स्वरोजगार व्यापार श्रमिक संघ । देशका विभिन्न भागमा भाँडा सफा गर्ने, स्टोभको पीन, वासरदेखि मौसम अनुसारको सागसब्जी फलफुल, खानेकुरा, कपडा, रेडियो–घडी–सीडी, बच्चाहरूको खेलौना जस्ता सामानहरू सडक, बस्ती र हाटहरूमा व्यापार गरी आफ्नो जीविकोपार्जन गर्ने श्रमिकहरूको अधिकार रक्षा गर्न यो युनियनको स्थापना भएको हो । 

स्वरोजगारहरू समेटेको यो युनियनमा नाङ्ला तथा चकटीका आधारमा व्यवसाय गर्नेदेखि निश्चित छानो तथा प्लास्टिक सेडमा बसेर व्यवसाय गर्ने श्रमिकहरू सङ्गठित छन् । हिंडेर टाढा–टाढासम्म घुमन्ते व्यापार गरिरहेका र साइकल, ठेला–गाडा जस्ता सवारीका साधनहरू प्रयोग गरी व्यापार गरिरहेका व्यक्तिहरू पनि यस युनियनका सदस्य बनेका छन् । काठमाडौंमा सडक व्यापारको विविध क्षेत्रमा सङ्लग्न श्रमिकहरू २०५९ पौष २५ गते पहिलो पटक भेला भएका थिए । त्यस भेलाले निर्माण गरेको कमिटीले २०६० जेठ ९ गते नेपाल सडक व्यापार श्रमिक संघ श्रम विभागमा नं. ८७ मा ट्रेड युनियन सङ्घको रूपमा दर्ता गरेको थियो । यसले २०६५ सालमा सम्मेलन गरी नेपाल स्वरोजगार श्रमिक संघ नामाकरण गरेको छ ।